Айтхылыкъ гёжеф болургъа итинип

Ёсе келген тёлюлени ариу халда юйретиуде, аланы кюч-къарыу, ниет жаны бла да чыныкъдырыуда спорт, айхай да, уллу магъананы тутады. Гитче гёжефлени араларында эришиуле уа хорламгъа итиниулюклери бла абаданланы араларында бардырылгъанларындан артха къалмайдыла. Жабелланы Халитди пллай умутландыргъан спортчуларыбыздан бириди.

Халит Жабелланы Хасанны бла Зухураны юйюрлеринде 2013 жылны 12 сентябринде туугъанды. Спорт бла уа алты жылында кюрешип башлагъанды. Алгъа атасы бла анасы аны гимнастикагъа бергендиле, грепплинг бла уа жыл бла жарымны кюрешеди.

Сынамы алыкъа аз болгъанлыкъгъа, Халит жетишимлери бла къууандыргъанлай турады. Кесини биринчи эришиуюнде ол доммакъ майдал  къытханды. Кёп болмай а СКФО-ну биринчилигине сайлау  эришиуледе хорлагъанды. Анда жаш юч сермеш бардыргъанды, аладан экисинде болжалдан алгъа къытханды. Эришиуню аллында бир кесек абызырагъан  эсе да, эс жыйып, хорлар ючюн битеу кючюн сала биледи.

Аны тренер Юнус Рустам юйретеди. Халит залгъа сюйюп жюрюйдю, тренери айтханны кёл салып толтурады. Жашчыкъ окъуууна да сакъды, жарау дерслерине чырмау этмейди. Ол угъай, кёп болмай тхэквондо бла кюрешип, жюзюуге да жюрюп башлагъанды.  Бош заманында уа легодан тюрлю-тюрлю машиналаны ишлерге сюеди.