Жашауну къысхартхан сылтауладан бири – аракъы

Ичгини ахырысы бла къоюу адамны жашауун 28 жылгъа узун этерге боллукъду, деп билдиреди «Express» издание  Швецияны Каролин институтуну алимлерини тинтиулерини эсеплерине таянып.

Экспертле 20 жылны ичинде Данияда, Финляндияда бла Швецияда ичгичилени къаллай бир тинтгендиле. Аланы араларында тюрлю-тюрлю аурууладан ёлгенлени саны иги да кёп болгъанды,  ёмюрлери уа 28 жылгъа къысхаргъанды.

Аракъыны адамны чархына зараныны юсюнден врачла дайым айтадыла. Аз ёлчемледе окъуна ол онкология аурууланы къозгъайды, мыйыны терк къартайтады, къаратонлукъгъа келтиреди. Жюрекге бла бауургъа да хаталыды.

Америкалы алимле уа адамны жашауун 10 жылгъа созаргъа болушурукъ тёрт къылыкъны  юсюнден эсгертгендиле. Алай бла кёгетлени  бла тахта битимлени  аслам ашаргъа, жарсыуладан бла мугурайып тургъандан къутулуп, жашауда къууанырча кезиулени ычхындырмазгъа, ичгиден бла  тютнден кери турургъа тийишлиди.

Тузланнган жаулу чабакъ терк къартайыудан сакълайды

Тузланнган чабакъны (сельбд) дайым ашау жюрек-тамыр системаны бла богъурдакъ безни ишлеулерин игилендиреди. Анда адамны чархына керекди витаминле, минералла, аминокислотала бла жаула бардыла, дейди врач-диетолог Светлана Фус.

Аллай  бир чабакъда Омега-3 жаулу кислотаны бир-эки кюннге керекли мардасы барды. Бу витамин  жетишмеген адамла мудахлыкъдан къыйналадыла, кёллери жарыкъ болуп турмайды. Андан тышында,  Омега-3 терини терк къартайыудан сакълайды, мыйыны бла кёзню сетчаткасына хайырлыды. Аны дагъыда бир  игилиги – йоду, селени бла Е витамини кёпдю. Ала адамны иммунитетин кючлейдиле, эркин радикалланы хатасын азайтадыла.

Диетолог Андрей Бобровский а адамны чархына соханны игилигини юсюнден айтханды. Ол фитаминледен, микроэлементледен бла фитонцидледен байды, ала уа чархны иммунитетин кётюргенден тышында, аш-азыкъны  эритирге болушадыла, жюрек-тамыр, нерва системалагъа да себеплик этедиле.