Энчилиги – жан аурута, къайгъыра билиудю

Социал ишни сайлап, анга кертичилей къалгъан адамла башхаладан энчидиле. Аланы жандауурлукъ сезимлери кючлюдю, жюреклери жумушакъды,  къайгъырыулуду. Атабийланы Ибрагимни къызы  Нина ма аллай адамды. Ол Черек муниципал районну социал арасында  ишлегенли онжети жыл болады.  Усталыгъыны магъаналылыгъын терен сезеди, къарагъан адамларыны намысларын кёреди, алагъа  ёз къызларыча къайгъырады. Хар бирине да жол табалады, къайгъыларын да чача биледи, не кереклерин да тапдырады.

-Нина  бизни жангызлыгъыбызны унутдурады, не жумушубузну  да тамамлайды.  Ол келсе, юйюбюз жарыйды, аны бетинден нюр ургъанлай турады,  жюрегинге хошлукъ берген сёзле да табалады. Анга жюрек халаллыгъы, эслилиги, бизге къайгъырыулугъу ючюн да бек  ыразыбыз,- дейдиле Огъары Малкъарда ол осуйлукъ этген адамла.

Къарыусузгъа  болушуу Нинаны къанындады. Ол бу усталыкъгъа  жаратылгъан кибик эди. Аны жюрек халаллыгъына, иш кёллюлюгюне, кёп жылланы  бет жарыкълы уруннганына бийик багъа да берилгенди: ол Черек районну администрациясындан, социал араны  оноучуларындан дайым махтау алады, грамотала, дипломла бла да кёп кере саугъаланнганды. Алай кеси уа бек уллу саугъагъа ол къарагъан адамланы анга ышаннганлары, ол келсе, ышаргъанлары, огъурлу, ыспас сёзле айтханларыды.

 

Холаланы Марзият.
Поделиться: