Тынгылы ремонтха къаллай ишле киредиле?

Аны юсюнден КъМР-ни Тарифле, эмда жашау журтлагъа надзор этиу жаны бла къырал комитетинде быллай ангылатыу жибергендиле: «Республиканы 2013 жылда 22 июльдан 62-РЗ номерли «Къабарты-Малкъар Республикада кёп фатарлы юйледе битеулю мюлкге тынгылы ремонт этиуню юсюнден» законуна тийишлиликде, быллай ишлени тизмеси жик жиги бла тохташдырылгъанды. Аланы барына да ахча тынгылы ремонт этиу жаны бла Фонддан къоратылады».

Алайды да, сагъынылгъан ишлеге ма была киредиле:

1) юйню ичинде электрокюч, жылыу, газ, суу бла жалчытыу эмда канализация системаланы жангыртыу;

2) лифтни жангыртыу неда алышындырыу, лифт шахталагъа ремонт этиу;

3) юйню башын жангыртыу, тюрлендириу, чардакъгъа чыгъаргъа онг болурча этиу;

4) юйню тюп (битеулю мюлкге саналгъан) отоуларына ремонт этиу;

5) юйню тышын жангыртыу эмда къабыргъалары жылы болурча этиу;

6) жашау журтну битеулю жумушларына къоратылгъан коммунал ресурсланы (электрокюч, жылыу, газ, суу) эсеплеген приборланы орнатыу;

7) юйню мурдоруна ремонт этиу;

8) сакъатланы коляскаларына тийишли пандусла орнатыу;

9) тынгылы ремонт этиу жаны бла проект-смета документацияны жарашдырыу;

10) аллай проект-смета документациягъа къырал экспертиза бардырыу;

11) юйде энергетика жаны бла тинтиуле (энергоаудит) бардырыу;

12) жашау журтну къурулуш конструкцияларын эмда инженер коммуникацияларын жангыртыу неда алышыу.

Кёп фатарлы юйде жашагъанла ол Фондха ахчаны артыгъыракъ тёлерге оноу этселе, артда аны хайырындан жыйылгъан ахчагъа башха тюрлю ишлени да тамамларгъа боллукъду.