Сёлешиуню баш темасы – шёндюгю эпидемиология болум эм аурууну жайылыуун тыйыу

Къабарты-Малкъарны Башчысы Казбек Коков видеоконференция халда КъМР-де коронавирус жукъгъан аурууну болдурмазча эм аны жайылыууна контроль этиу оператив штабны кезиулю жыйылыуун бардыргъанды. Эпидемиология болумну эм аурууну болдурмазча этиу амалланы юсюнден КъМР-де Роспотребнадзорну таматасы Жирослан Пагов эм КъМР-ни саулукъ сакълау министри Рустам Калибатов айтхандыла.

Быйылны 27 июлюна коронавирусха 633884 (суткагъа 1418) лаборатор тинтиу бардырылгъанды, 26652 жугъуу болум ачыкъланнганды (суткагъа 85), ёлгенле – 585 (суткагъа 3), къайтышханла – 24556 (госпитальдан суткагъа 51 адам чыкъгъанды). Госпитальлада медицина болушлукъну 689 инсан аладыла. Реанимациялада 91 саусуз турадыла. Битеулю госпиталь жатар жер къолайлыкъ 820-ды, Терк эм Чегем муниципал районланы Ара район больницаларында, СПИД арада да къошакъ жерле къуралырча битеу онгла этилипдиле.

КъМР-ни саулукъ сакълау министерствосу саусузлагъа кислород болушлукъ тапдырылырча госпитальланы къошакъ оборудование бла жалчытады, дарманланы жыйымдыкълары контрольдадыла эм толтурулгъанлай турадыла, ол санда энчи къоруулаучу затла. Рустам Калибатов эки арт ыйыкъгъа госпитальлагъа салыннганланы саны 175 процентге кётюрюлгенин айтханды, реанимация саусузланы  24 процентге.

Министр адамгъа, респиратор аурууну биринчи ышанларын кесини халинде сезгенлей, болжалгъа салмагъанлай врачха барыргъа кереклисине энчи эс буруп айтханды, нек дегенде, коронавирус жукъгъан аурууну ышанлары кёбюсюнде тёрели ОРВИ-никилеге ушагъанлары, ызы бла ауур халгъа терк кёчгенлери ючюн. Инсан медицина махкемеге кеч келсе, аны багъаргъа къыйыныракъ болады, ёлюрге къоркъуу да бегирек чыгъады.

Тамата санитар врач ауругъанланы саны ёсюп баргъанын белгилегенди, аланы араларында индия штамм бла жукъгъанла кёбейгенлерин айтханды. Ол бу штаммны бирсиле бла тенглешдиргенде, аны жугъуу кючю уллу болгъанын, эм саусузла андан бютюн къыйналгъанларын чертгенди. Къурала тургъан халгъа кёре Жирослан Пагов Оператив штабха социал бёлюмню учрежденияларын энчи низамгъа кёчюрюрча эсгертиу этгенди. Андан сора да, ол предприятияланы эм организацияланы таматаларына битеу ишчилерине 10 августха дери вакцинаны биринчи компонентин салдырыргъа тийишлисин эслерине салгъанды. Белгиленнген кюнден сора Роспотребнадзор тамата санитар врачны излемлери толтурулгъанларына бла къалгъанларына къарарыкъды.

Жамауатны коронавирус жукъгъан ауруудан иммунизация этиу соруу жаны бла Рустам Калибатов бюгюнлюкге вакцинаны биринчи компоненти  114650   инсаннга, экинчиси 73672 этилгенин билдиргенди. Вакцинация бардырыуну тирилиги ёсгенди, алай коллектив иммунитетни къуралыууна ала алыкъа азлыкъ этедиле.  Министр республикада бюгюнлюкде 82 вакцинация жер ачылгъанын, ала эрттенликде сегиз сагъатдан ингирде сегиз сагъатха дери ишлегенлерин айтханды. Иммунизацияны бардырыугъа 718 медицина ишчи къошулады, тышына чыгъып ишлеген бригадала организация коллективледе иммунизацияны бардырадыла. Мобил пунктла базарлада эм сатыу-алыу аралада ишлейдиле. 

Оператив штабны кенгешини эсеплерине кёре КъМР-ни Башчысы Казбек Коков коронавирус жукъгъан ауруу жайылмазча социал бёлюмню учрежденияларында жабыкъ халлы низамны тохташдырыу соруугъа къараргъа буюргъанды.