Акъылбалыкъ болмагъанланы эркинликлерин къоруулаугъа – энчи эс

Къабарты-Малкъар Республиканы Башчысы Казбек Коков акъылбалыкъ болмагъанланы эркинликлерин бузуу ишлени болдурмазча соруула жаны бла ишчи кенгеш бардыргъанды. Жыйылыугъа КъМР-ни Башчысыны Администрациясыны таматасы Мухамед Кодзоков, КъМР-де сабийни эркинликлери жаны бла уполномоченный Светлана Тлинова, КъМР-ни жарыкъландырыу, илму эм жаш тёлюню ишлери жаны бла министри Анзор Езаов, КъМР-ни урунуу эм социал къоруулау министри Асанланы Алим, КъМР-ни Башчысыны Администрациясыны таматасыны орунбасары Индрис Тлупов къатышхандыла.

Светлана Тлинова сабийлени эркинликлерин бузуу ишлени болдурмазча бёлюмде къуралгъан жумушланы, акъылбалыкъ болмагъанланы ишлери жаны бла, опека органланы эм попечительликни комиссиялары тындыргъан жумушланы юслеринден хапарлагъанды.

Казбек Коков сабийлени, ол санда осал къылыкълы юйюрледен болгъанланы, эркинликлерин эм сейирлерин къоруулау сорууланы белгилеген республикалы норматив мурдорну тинтирге буюргъанды. Андан сора да, ол КъМР-ни Правительствосунда Акъылбалыкъ болмагъанланы эм аланы эркинликлерин къоруулау иш жаны бла комиссияны энчи жыйылыууна ыйыкъны ичинде ол жаны бла халны тюзетирча предложенияла жарашдырыргъа буюргъанды. Республиканы оноучусу сабийлени сейирлерин къоруулау, юйюрню социал къоркъуулу болумгъа тюшгенине заманында эс буруу, сабийлерине ата-анала эм башха жууаплы адамла къарамай къойгъан кезиуледе чыкъгъан соруула бла кюрешген жууаплы службалагъа байламлыкъ жюрютюрге тийишлисин чертгенди.