«Жарауларымы дайым бардыргъанлай турлукъма»

Тырныауузну 5-чи номерли гимназиясыны окъуучусу Тамирлан Абулькин тенгшилерини асламысыча жыгъышыу, бокс, каратэ неда ауур атлетика бла кюрешмегенлей, спортну оюн тюрлюлерине энчи эс бурады. Нек сайлагъанды ол топ оюнланы? 

- Жууап алайды, - дейди Тамирлан, - мени тийишли юлгюлерим бардыла – атам эм аппам кеслерини заманларында ахшы футболчула болгъандыла, волейболдан бла баскетболдан эришиулеге къатышхандыла. Аланы ызлары бла баргъанма. Спорт бла сабийлигимден кюрешип башлагъанма, ёсгенден сора атама (ол физкультурадан устазды) школ спорт залгъа жюрюп, абаданыракъ сабийле бла ойнап тургъанма. Залда эм стадионда жараула кеслерин билдиргендиле – мен КъМР-ни футболдан биринчи дивизионунда биринчилигине къатышхан «Эльбрус» командагъа къошулгъанма. Ол заманда сегизинчи классда окъугъанма. Манга бусагъатда оналты жыл болады, командабыз а бийик дивизионда кесин сынайды.

Тамирлан кесин мини-футболда да кёргюзтгенди – юч жылны ичинде Мызыланы Мухтарны хурметине аталып бардырылгъан район турнирлени эм иги ойнаучусу болгъанды. Ол спортну башха оюн тюрлюлеринде да жетишимлиди. Сёз ючюн, волейболда – КъМР-ни спартакиадасына къатышады, республиканы жаш тёлю жыйымдыкъ командасыны келечисиди. Команда бла бирге ол ЛОКОбаскет Битеуроссей турнирни зоналы эришиулеринде да хорлагъанды.

Кесини спорт жетишимлери ючюн Тамирлан эки кере «Артекде» болгъанды. Путёвкаланы анга республика бергенди, ол Элбрус райондан алай бла ары баргъан биринчи школчуду.  Халкъла аралы сабий арада Абулькин кесин ахшы жаны бла кёргюзтгенди. Биринчи келгенинде, 2019 жылда, ол анда футболдан бла волейболдан лагерь команданы капитаны эди. Спортда жетишимлилиги ючюн ол алтын белгиге тийишли болгъанды. Быйыл да ол «Артекде» волейболдан эм иги ойнаучу болуп, эсде къаллыкъ алтын майдал бла саугъаланнганды. Аны отряды тарыхда биринчи кере РосМорПорт тенгиз многоборьени кубогу ючюн эришиуледе хорлагъанды.

Тамирланны саугъалары аслам жыйылгъандыла. Ол окъугъан да бек иги этеди, «Жылны волонтёру» конкурсда алчыды. Жаш тюрлю-тюрлю форумлагъа да къатышады, ол санда «Старт. Машукга». Ол «Уллу перемена» эришиуню жарым финалына жетгенди эм Россей школчуланы къымылдауларыны Элбрус районда алчысы болгъанды.

Эндиги окъуу жылда Абулькин школну тауусурукъду. Къайсы ызда билимин андан ары ёсдюрлюгюне алыкъа сагъыш этеди. «Алай къайсы вузну сайласам да, - дейди Тамирлан, - спорт бла кюрешгенлей турлукъма, ансыз жашаяллыкъ тюйюлме».