Налогла жыйыучула жетишимли ишлегенлери кёрюнеди

Федерал налог службаны Къабарты-Малкъарда бёлюмю быйылны биринчи жарымында къыралны бюджетине 8,377 миллиард сом жиберип, аны бла борчун 14,5 процентге артыгъы бла толтургъанды, дегендиле УФНС-де. Ол санда федерал бюджетге 1,87 миллиард сом бёлюннгенди, республиканы бирикген бохчасына уа 5,8 миллиарддан азмаз кёп сом баргъанды. Мында да экинчи кёрюмдю план бла белгиленнгенден жыйырма процентге кёбюрек болгъанды. Бирикген бюджетден районлагъа 1,514 миллиард сомну бёлгендиле. Дагъыда страховой тёлеуле бла тюрлю-тюрлю фондлагъа 4,877 миллиард сом жыйып жиберилгенди. Ол санда Пенсия фондха – 3,587 миллиард, болжаллы халда эмда аналыкъ сылтау бла ишсиз тургъанлагъа социал жаны бла страхование этиуге – 426,7 миллион сом бёлюннгенди. Уруннганланы медицина страхованияларына деп, тийишли Фондха да 863,6 миллион сом жиберилгенди. Бу кёрюмдю 8,3 процентге кёбейгенди.