Зыбыр коммунал къалгъан-къулгъанланы жаратыугъа – аслам эс

Кёп болмай КъМР-ни Къурулуш эмда жашау журт –коммунал мюлк министрини орунбасары Роман  Котченко бардырып  кенгеш болгъанды.  Анда сёз республиканы Башчысы Казбек Коковну   зыбыр коммунал къалгъан-къулгъанланы жыйыуну эм, жарашдырыуну тап халгъа келтирирге эм  эркинликсиз къуралгъан свалкаланы къурутургъа  деген буйругъу къалай толтурулгъанына  къаралгъанды.

 Жыйылыугъа  Нальчик шахар округну администрациясыны специалистлери,  жашау журт-коммунал мюлк компанияланы таматалары, регион операторну келечилери эмда башхала  къатышхандыла.      

Жыйылыуда  биринчи айтылгъан жумушладан  бири кир-кипчик атылгъан орунла бла толу жалчытыу, ала тургъан жерлени тийишли халгъа келтириу  болгъанды. Жарсыугъа,  регион оператор бу жаны бла борчун толтурургъа кюрешсе да, бир-бир жерледе осал  санитар болум сакъланады.  Халны игилендирир ючюн а  шахарны администрациясы управляющий компанияла бла байламлыкъда ишлерге кереклиси айтылгъанды.        
Шахарчыланы  асламысы  да  тёгерек-башда  тазалыкъны   сакъланырына уллу эс бурмайдыла. Сёз ючюн, зыбыр къалгъан-къулгъанланы  къурамларына кёре жыяргъа кереклисин  эслерине сала турургъа тюшеди. Андан сора да, къурулуш материалланы  кетериу тарифге  кирмегенин да  кёпле билмегенча этедиле.  Аланы адамла свалкагъа  кеслериэлтирирге, неда оператор бла къошакъ халда келишим къураргъа  керекдиле.

Болсада кёп фатарлы юйлени  арбазларында  къурулуш организацияла эм предпрнимательле къурагъан  багуш  тёбелеге да  тюберге тюшеди. Ол  санитар болумгъа келишмегенден сора да,  жашау журтланы иелерине  уллу заран саладыла.   Энди алай этгенле  административ жууапха тартыллыкъдыла. 

Кенгешни ахырында жашау журт-коммунал мюлк компаниялагъа кёп фатарлы юйлени иелери бла ангылатыу иш ётдюрюрге, контейнерлени болумларын терк-терк тинтирге, багуш мардасындан кёп жыйылмазча, регион оператор борчун графикге кёре толтурурча   мониторинг  бардырыргъа буюрулгъанды.  Тийишли ишле сылтаусуз тамамланыр ючюн   коммунал жумушла ючюн  хакъны болжалындан кеч къалмай тёлерге кереклиси да эсгертилгенди.