Сугъарылгъан жерлеге танг къошулады

 Къабарты-Малкъарда „Агропромышленный комплексни экспорту»,   «Халкъла аралы кооперация эм экспорт»  регион эм  миллет проектлеге кёре, жылны ахырына  сугъарылгъан жерлени 4720 гектаргъа жетдирир мурат барды.

Битеу да  2,2 минг гектар жер сугъарылырча этиуню планындан  46,6 проценти толтурулгъанды. Аграрчыла  Терк, Прохладна, Май эм Бахсан районлада  жауун жаудургъан амал сугъаргъан 25 машинаны  жарашдыргъандыла,- деп билдиргендиле Эл мюлк министерствону пресс-службасындан.

Быйыл тийишли  ишлеге  356 миллион сом бёлюнюрюкдю. Аны асламысы, неда 352,4 миллион сом федерал бюджетденди, республика да кесинден 3,6 миллион сом къошарыкъды. 

 - Бусагъатда  предпринимательлеге 162,5 миллион сомгъа  субсидияла  берилгендиле. Аны себеплиги бла  он инвестициялы проектни  бардырыргъа онг табылгъанды.  Кеси кючлери бла жерлерин сугъарып  кюрешгенле да, ишлерин бошагъанларындан сора,  министерствогъа керек документлени тапдырсала,  къыралдан болушлукъ алаллыкъдыла,- деп къошханды КъМР-ни эл мюлк министри Хасан Сижажев.  

Эл мюлк жерлени игилендириу, ол санда   сугъарырча мадар этиу республиканы агропромышленный комплексин айнытыу жаны бла къыйматлы амалладан  бирине саналады. Анга  миллет проектледен тышында «Россейни мелиоратив комплексин айнытыу» ведомстволу программа да киреди. 

Саулай алып айтханда, шёндю республикада сугъарылгъан эл мюлк жерле   8,5 минг гектарны тутадыла.