Жангы юй алгъанлагъа - эсгертиу

 Юйню, фатарны сатыу-алыу бла байламлы ишле бла, баям, кёплеге кюреширге тюшеди. Алай былайда тапсыз болумгъа тюшмез, алданмаз  ючюн, эссизлик этерге жарамайды. Юридический жаны бла не этерге кереклигини юсюнден бизни бла ушагъында адамланы эркинликлерин къоруулау «Правовая защита» регион организацияны юристи Бекхан Ужахов айтханды. Алай бла фатар алгъанда агентстволаны, нотариусланы эм юристлени болушлукълары бла хайырланыргъа боллукъду. Аланы хар бирин да энчи тинтейик.

Агентсвола: неге эс бурургъа керекди?

Ахыр жыллада сатыу-алыу рынокда агентстволаны магъаналары жангыз уллу шахарлада угъай, бизни республикада да ёсе барады. Алай былайда бек сакъ болургъа тийишлиди. Нек дегенде биркюнлюк фирмала, жалгъан юридический офисле аслам жайылгъандыла. Аллайлагъа «тюртюлмез» ючюн, организацияны уставына, регистрация этилгенине шагъатлыкъ  документлерине къарагъыз, ол къаллай бир заманны ишлегенин да сураргъа унутмагъыз. Эсгертиу: документлени копияларын берселе, унамагъыз, ол сизни законлу эркинлигигизди. Аланы бермегенлери уа – фирма жалгъан болгъаныны биринчи шартыды. Сертификацияны ётген агентствону специалистлери дайым усталыкъларын ёсдюргенлей, энчи программала бла билимлерин жангыртханлай туруучудула. Сертификациялары болгъан фирмаланы тизмеси уа Россейли риэлторланы гильдиясында эм аны Интернетде сайтында жазылыпды.

Нотариусланы хайырланыу: иги эм аман жанлары

 Келишимни нотариусну болушлугъу бла тауусуу эм къоркъуусузгъа саналады. Аланы барысына да страхование этиледи. Нотариус битеу этген ишине законну аллында жууаплыды. Ол юйге арест салыныпды неда ол залогдады дегенча чурумла чыкъмазча тинтиуле бардырады, нотариальный ишлени реестринде келишимни эсепге салады. Сора  документ эки экземплярда сакъланады, аладан бири нотариусда къалады. Алай бла сиз бир тюрлю сылтау бла къагъытларыгъызны тас этсегиз, аланы копияларын андан алаллыкъсыз.

 Нотариусну ишини бек уллу кемчилиги – аны багъасыны уллугъундады. Ол документлени жыйып айланмайды, аны бла сиз кесигиз кюрешириксиз. Сора ол поддельный бланкны хайырланады дегенча ишеклигигиз бар эсе, Нотариальный палатада болушлукъ излерге боллукъсуз. Анда битеу бланкланы юслеринден информация берликдиле.

Сизге ёкюл болуша эсе

 Юрист къаллай документлени жыяргъа кереклигин ангылатырыкъды, аланы жалгъан бла керти болгъанларын айырыргъа юйретирикди. Келишимни тауусуу бла байламлы къоранчларыгъызгъа, сизге юйню сатхан адам андан болжалдан кеч къалмай кетеририне къарарыкъды. Андан сора да, ол фатарны алгъыннгы иелери коммунальный жумушла ючюн борчлары сизге къалмаз ючюн да кюреширикди, ала юйню сатаргъа сокъурансала, болушурукъду. Жангыз да бийик квалификациялы ёкюлню табаргъа керекди.

Алданмаз ючюн талай эсгертиу

 Сизге юйню сатхан адамны налог аз болсун деген сылтау бла келишимде ахчаны белгиленнгенден эсе аз ёлчемин жазайыкъ деген тилегин къабыл кёрмегиз. Ол артда аны бузаргъа умут этсе, сиз ахчагъызны келишимде айтылмагъан кесегин къайтараллыкъ тюйюлсюз. Фатаргъа законсуз перепланировка этилген эсе да, аны ючюн жангы иеча сиз жууаплысыз. Ол себепден, анга да эс буругъуз.

Юйню алып башлагъанлай окъуна анда жашагъан битеу адамла «выписаться» этсинле деп къаты болугъуз. Аны иеси не тюрлю сылтау бла да заманны соза эсе (асламысында ала буагъатда башха барыр жерибиз жокъду деучюдюле), келишимге къол салыргъа, ахчаны берирге ашыкъмагъыз. Нек дегенде, быллай болумлада сюдле асламысында аны алгъыннгы иеси жанлыдыла. Ала анга сизни ахчагъызны къайтарыргъа буюрсала да, аны саулайын бир кереге угъай, акъырын-акъырын къайтара турургъа эркинлиги барды. Ол а онла бла жыллагъа созулургъа боллукъду.    

Сора юйню алып, юридический жаны бла битеу жумушланы тамамлагъандан сора, Юстицияны управлениясында регистрацияны мычымай ётюгюз. Ансыз сиз аны иесине саналмайсыз. Бу жумушлагъа 15-30 кюн кетерге боллукъду, алай андан сора сизге жангы фатаргъа эркинликле толусунлай берилликдиле.