«Погонланы кийген, жюрютген да къыйын, жууаплы ишди»

Созайланы Жаннета – Чеченланы Хамидни къызы, РФ-ни Следствие комитетини КъМР-де следствие управлениясыны ишлегенли 13 жылдан аслам болады. Бюгюнлюкде ол Бахсанда бёлюмюнде следовательни болушлукъчусуду,  документлени алыугъа, эсепге салыугъа, следствиягъа дери   бардырылгъан тинтиулени, уголовный ишлени эсепге салыугъа жууаплыды.

Жаннетаны бизге айтханына кёре, ол право низамны сакълаучу органлада ишлерге сабийлигинден да сюйгенди. «Погонла жюрютген тиширыула сейир, аламат кёрюннгендиле.  Сабийликден да тюзлюкню бек сюйгенме,  ачыгъан адамгъа болушургъа хазыр эдим. Аны ючюн сайлагъан да болурма право низамны сакълаучу органланы – аманлыкъчылагъа къажау турур ючюн»,-дейди бизни бла ушакъда ол.

Болсада къызны жашауда быллай жууаплы сайлауну этерге  юлгюсю къатында болгъанды. Аны атасыны эгечи Чеченланы Фатимат кёп жылланы республиканы сюд органларында ишлегенди. Бюгюнлюкде да ол КъМР-ни Баш сюдюню судьясыды. «Аны къатында мен  башха усталыкъны юсюнден сагъыш да этмегенме. Атам Хамид  бла анам Фатима  бизге, сабийлеге, билим берирге,   не башламчылыгъыбызда да болушургъа хазыр болгъандыла, бу  усталыкъны сайлагъанымда да ыразылыкъларын айтхандыла»,-деп къошады Жаннета.

Алай бла школдан сора ол Къабарты-Малкъар къырал университетни юридический факультетине киреди. Аны бошагъан жылда уа Россейни прокуратурасында жангы бёлюм ачылады – Следствие комитет. Бийик билимни юсюнден дипломну къолуна алгъан къыз бу жангы структурада ишлерге мурат этеди. «Юйюрюм, жууукъларым   сайлауума ыразыдыла, бир кере да аладан ол тиширыуну иши тюйюлдю, башха жумуш тап дегенни эшитмегенме. Алай итиниулюгюмю, сайлаууму ангыламагъанла да аз тюйюлдюле»,-дейди ол.

Бюгюнлюкде къызла аскерде къуллукъ этедиле, полицияда да аз тюйюлдюле тиширыула, полковник, генерал чыннга дери ёсюп, жамауатдан хурмет табадыла. Ол да заманны излеми болур. Сёзсюз, тиширыу кесини борчларына жууаплы къарарыкъды, аны бла бирге уа аны жумушакъ жюреклиги терсликни, огъурсузлукъну этерге къоярыкъ тюйюлдю. «Погонланы кийген, жюрютген да къыйын, жууаплы ишди. Мен уллу, магъаналы структураны бетин кёргюзтеме. Бирде ишде къаты оноула чыгъарыргъа, жууапла берирге тюшеди, ансыз болмайды. Алай юйде мен жумушакъ, сюйген анама, юй бийчеме. Ишни юйге келтирирге, жарсыуларынгы жууукъларынга жагъаргъа жарамайды»,-деп чертеди ол. 

Насып дегенни хар адам да кесича ангылайды. Бирле аны къуллукълада,  уллу ырысхыда кёредиле,  экинчиле башхалагъа болушханда сезедиле, ырахматлыкъ тынчлыкъ. Алай жашауда сюйген иш тапхан, хар кюн да ишчи жеринге къууанып келген да бир жанындан уллу насыпды. Ишсиз адам алгъа бармайды, айнымайды, деп акъыл этеди Жаннета.    

 - Мен  сюйген, сабийлигимден итиннген иш бла кюрешеме, атамы, анамы алларында къыз борчуму толтурама, эгечлик этеме, юй бийчени, ананы жумушлары  артыкъда магъаналыдыла. Бюгюнлюкде уа сабийлерими насыпларын, аланы къууанчлы жашауларын, жарыкъ келир кюнлерин кёрюрме деп ышанама. Жашаууму жангыдан башларгъа онгум болса да, бир затны да тюрлендирлик тюйюл эдим – битеу жангылычларым, жетишимлерим да къайтарылсала сюерикме. Жашау къуру жетишимледен къуралмайды, хар ким да  къадарында болгъан  сынауладан ётерге керекди. Ала бизни оюмлу этедиле, акъыл къошадыла, сынау бередиле,-дейди ол.