Къолларыгъыз ариу болурларын сюе эсегиз

Къолларынгы териси жумушакъ, ариу болурун сюемисе? «Айхай да, -дериксе. - Алай юйде не къадар жумушум барды». Анга кёп заман керек тюйюлдю, къолланы терилерин артда игилендирирге кюрешгенден эсе, сакълагъан тынчыракъды. Къалай бла? Аны амалларына косметолог Эдикаланы Асият юйретеди.

                                                                  х х х

Бек алгъа юй жумушлада разин къол къапланы хайырланыгъыз. Ала бла адыр, быстыр да жууаргъа, кёгетлени да тазаларгъа  боллукъду. Къол къапланы  киерден алгъа уа къолланы тынгылы жууаргъа, къургъакъсытыргъа, аз-маз тальк  себерге да керекди.  Ишигизни бошагъандан сора уа  къолларыгъызны  къолкъаплада тургъанлай жууугъуз, ызы бла аланы тешип,  ич жанындан чайкъагъыз, сора  къурутуп эки жанындан  да тальк  себип  салыгъыз. Къолларыгъызны  уа жылы сууда жуууп, къургъакъсытып, крем жагъыгъыз.

                              х х х

Кремни терк-терк жагъа турсагъыз, къолланы териси жумушакъ да, ариу да  болады. Аны уа къолларыгъызны хар жуугъаныгъыз сайын, бютюн да кече жатарны аллында жагъаргъа керекди.  Ары дери уа къолларыгъызны  жылы сууда сапын бла тынгылы жууугъуз. Кремни да бек алгъа бармакъланы  къыйырларындан жагъып башлагъыз.

                                 х х х

Къолланы териси къургъакъ болуп жарыла эсе, анга жаулу чулгъам болушурукъду. Къолланы жылы сууда жуууп, жылы жауда жибитилген салфетка бла чёргеп,  башындан къол къапланы киедиле. Къол къапла мамукъдан, жюнден этилгенле болургъа керекдиле. Синтетикалыла арталлыда жарамайдыла. Бир эмда бир бла жарым сагъатдан   салфетка кетериледи, къалгъан жауну  къагъыт неда кисей журунчукъ бла сыйпайдыла. Алай этгенден сора къолланы жууар кереклиси жокъду.

                             х х х

 Къолланы териси жыйырылгъан эсе, аны тап этер ючюн жумуртханы сарысын бла бир уллу къашыкъ балны бирге къатышдырып, ингирде  жагъаргъа керекди. Анга дагъыда ромашканы, шалфейни, жёгени  гюлюн бирге  къатышдырып жарашдырылгъан суу  да жарайды. Аны иссилей адыргъа    къуядыла, тёзерча болгъандан сора 10-15 минутха къолланы ары саладыла, ызы бла аланы жумушакъ жан жаулукъ неда къагъыт  салфетка бла къургъакъсытып, жаулу  кремни жагъадыла.

Дагъыда  сельдерей къайнатылгъан суу да хайырлыды. Бек уллу болмагъан тамырны 30 минутну ичинде бир литр сууда къайнатадыла.

 Картоф крахмал да жарайды. Бек   алгъа бир стакан исси сууда крахмалны   чай къашыкъ бла бирин биширип, ызы бла аны бир литр жылы суу бла къатышдырадыла.

                                      х х х

Къолну  терисин жумушатыргъа глицерин бла нашатыр спирт къошулгъан жылы суу да болушадыла. Эки литр жылы суугъа бир уллу къашыкъ бла  глицеринни эмда чай къашыкъ бла нашатыр спирт къошадыла эмда къолланы ол сууда тутадыла.

Наша туурамчыкъ бла ышылса неда картоф бишген сууда жууулса да къолланы терилери жумушайдыла. Бахчада ишлегенден сора къаралгъан къолла бал туз къошулгъан сапын сууда жууулсала агъарадыла.

                                            х х х

Аяздан къолланы териси бузулду эсе, алагъа  бишген картоф жабышдырса игиди. Къабугъу бла бишген эки картофну алып, аны эки чай къашыкъ бла бир лимон  неда  наша сок бла къатышдырадыла. Сора жылылай къоллагъа къалын жагъып, целлофан бла чулгъайдыла, 15 -20  минутдан аны жуууп кетерип, крем жагъадыла.

                                     х х х

Къолла бек терлей  эселе, акъ талны  къабугъуну  сууу жарайды. Ууакъ тууралгъан эки чай къашыкъ тенгли бир къабукъгъа тёрт  стакан къайнар суу  къуюп,  15-20  минутну турма къоядыла, ызы бла сюзюп, сууутуп, андан сора жылы ванначыкъла этедиле.

Анга эменни къабугъун хайырланыргъа да болады. Бек  гитче  тууралгъан элли граммын бир литр  исси суугъа къуюп, отуз минутну къайнатадыла, ызы бла сюзюп, сыра бетли болгъунчу суу къошадыла. Ванначыкъдан сора  къол аязны тынгылы къурутуп, борный  кислотаны бла талькны бирге къатышдырып ышыйдыла.

                                         х х х

Къоллагъа гимнастика амалла этерге  да унутмагъыз. Аланы бек къыйын болмагъан бир ненчасын айтайыкъ. Бу затланы эрттенликде неда бош заманыгъызда этерге  боллукъсуз.

  1. Къол бармакъланы тыншчыкъ жумдурукъгъа къысып, ызы бла ачыгъыз.
  2. Эки  къол аязыгъыз бла столгъа тирелигиз. Къол аязны не бармакъланы столдан айырмай, къолугъуздан келгенича, хар бармакъны ёрге кётюрюп, ызы бла энишге жиберигиз. Энди уа  бармакъла бла столгъа тиймей тюз алай этигиз. Бу упражненияны эте туруп, бармакъланы къыйырлары бла столну къаты урургъа кюрешигиз.
  3.  Жингириклени столгъа салып эки къол аязны бирге къошаргъа кюрешигиз. Ызы  бла бармакъланы бир бирге къаты тиреп къол аязны бир бирден айырыгъыз.
  4. Жингириклени столгъа салыгъыз. Къолланы тёгерекге буругъуз.
  5. Къолланы ёрге кётюрюп, аланы артха бла алгъа бюге, тёгерекге буругъуз.
Холаланы Марзият хазырлагъанды.
Поделиться: