Эл мюлк продукция чыгъаргъанлагъа себепликге

РФ-ни Эл мюлк министерствосу бла Къабарты-Малкъарны  Правительствосу  «Халкъла аралы кооперация эм экспорт»  миллет проектни чеклеринде  келишим бегитгендиле. Анга  кёре республикада чыгъарылгъан  эл мюлк продукцияны экспортха жибериуге себепликге 110 миллион сом бёлюнюрюкдю,- деп билдиргенди  КъМР-ни эл мюлк министерствосунда финансла, экономика эм къырал болушлукъ берген управленияны  таматасы Ирина Кулакова.

Бюгюнлюкде  Россейни Эл мюлк министерствосу  бла КъМР-ни Правительствосу сегиз  келишимге къол салгъандыла. Аланы юсю бла 1,6 миллиарддан аслам сомгъа болушлукъ  берилликди. Ол санда 1,5 миллиард  сом – къыралны, 129,9 миллион сом а - республиканы бюджетинденди. «Фермерле бла кооперациягъа себеплик этиу»  проектни юсю бла республикагъа нелляй бир ахча бериллиги келир айда белгили боллукъду. Дагъыда «Экспорт АПК»  проект бла да 112,5 миллион сомгъа  келишим этилгенди», - дегенди Кулакова.

Былтыр  КъМР-де  агропромышленный  комплексде  4,4 минг чакълы  предприятиягъа бла гитче предпринимательлеге къыралны бюджетинден 2,3 миллиард сом берилгенди. Шёндюледе республикада 36 эл мюлк организация, 6574 элчи-ферма мюлк бла энчи  предприниматель бардыла. Былтыр республиканы аграрийлери 46,9 миллиард сом  багъасы продукция чыгъаргъандыла.  Андан гитче мюлклеге 14,8 миллиард сом жетеди.