Ата-ананы къачы уллу болса...

Жашауда битеу иги затла уллу къыйын салынып тамамланыладыла. Юйюр къурагъан, аны сакълагъан,  башхалагъа юлгю болурча этген да тынч тюйюлдю. Къашхатауда Улбашланы Сахадинни юйюрю ма аллайладанды. Ол республикада угъай да, андан тышында да аты кенг белгили эмда хар ким да сюйген, багъалагъан жырчыбыз, КъМР-ни халкъ артисти Улбашланы Азнорну жашыды. Отуз эки жылны КъМР-ни Ич ишлеринде  къуллукъ этгенди, полковник чында солуугъа чыкъгъанды. Алай  бюгюн да иш юсюндеди - Черек районну администрациясыны  башчысыны орунбасарыды. Эки бийик билими барды - тарыхдан бла обществоведениядан эмда СССР-ни МВД-сыны  бийик школу.

Биринчисине кёре ол  кюн сайын да абаданла, жаш тёлю бла тюбеше, бир онг болуп, алагъа сейирлик хапарла айтыучуду.  Кимге да ушакъ нёгерлик эталады. Аны таныгъанла кёп билгенин белгилейдиле. Ич ишледе  къуллукъ этгени да кесини ызын къойгъанды - низамгъа, жууаплылыкъгъа бек къатыды, буюрулгъан ишни  тынгылы толтурады. Бек башы уа - районну оноучуларындан бири болуп, анда жашагъанлагъа сёзю, иши бла да эс тапдырыр ючюн къолундан келгенни аямайды. Къайда да черекчилени атларындан сёлешип, бетлерин чыгъарады.

Сахадин аламат атады, чынтты юйюр башчыды.  Быйыл  Дуния артий комитетни  Шимал Кавказда представительствосу "Ариулукъ эм чомартлыкъ дунияны къутхарырла" деген ат бла бардыргъан  байрамны кезиуюнде юлгюлюлени араларында  Улбашланы  юйюрю да айтылгъанда, мен бек къууаннганма. Сахадин бла Марина сахнагъа чыкъгъанларында уа, залда олтургъанла ыразылыкъларын толкъун къарсла бла билдиргендиле. Ол а  аланы  кёпле таныгъанларын эмда хурметлегенлерин кёргюзтген шартды.

Юйюрню юсюнден айта келгенде, аны от жагъасын сууутмай сакълагъан юй бийчеге да ыспас этерге тийишлиди.  Марина сабий врач-неонатолог усталыкъгъа юйренип, медицинада  отуз жыл ишлегенди. Кёп къызчыкъланы бла жашчыкъланы ол дуниядан къайтаргъанды. Ала бусагъатда окъуйдула, бирери бирер жерде урунадыла,  халкъгъа жарайдыла. Саулукъ сакълау министерствода ишлегенинде да, кёплеге  эс тапдыргъанды. 

Улбашлары эки къыз ёсдюргендиле. Тамата къызлары Мариана, анасыны жолу бла барып, врач-акушер-гинекологду, Перинатал араны ЭКО бёлюмюне башчылыкъ этеди. Медицинада уруннганлы онбеш жылдан иги да атлагъанды. Баш иеси Закуланы Анзор бла эки къыз, жаш да ёсдюредиле.

Милана да, эки бийик билим алып, "КъМР-Медиа" къырал казна учрежденияда  бёлюмню таматасыды. Ол да жаш ёсдюреди.

Сёзсюз, эки къызларына, туудукъларына да Сахадин бла Марина жаланда ана бла ата, аппа бла ынна болуп къалмай,  керти  шуёхларыдыла. 

-Атабыз, анабыз да  бизге уллу сёлешмегендиле бир заманда да. Аланы бир сёзлери неда  къарамлары да бизге тамамлыкъ этеди. Бизни ючюн аланы бетлери къызармагъанды. Ала бизни бир бирибизни  къаты тутаргъа юйретгендиле. Арабызда сеники, меники жокъду. Байрамлада  бирге жыйылабыз.  Алагъа алгъадан хазырланабыз,-дейди Милана.

Бир жол манга юйюр ол неди деп соргъанларында, мен а былай жууаплагъанма:  "Юйюр - ол насып биргелерине  жашагъан  адамланы жыйыныды. Анда бир бирге уллу кёллюлюк жокъду, жаланда сюймеклик, жюрек халаллыкъ эмда  бир бирге билеклик этиу  бардыла. Ала чексиз кёпдюле". Ма бу сёзлени  бюгюннгю жигитлерими юйюрлерине арсарсыз жораларгъа боллукъма.