Оюнла, лекцияла, мастер-классла боллукъдула

Къабарты-Малкъар Республикадан «Жулдузчукъла» деген ансамбль Москвада бардырылгъан маданият сабий форумгъа къатышырыкъды.

25-29-чу августда Москва шахарда биринчи Маданият сабий форум бардырыллыкъды. Анга СНГ-дан эм РФ-ни субъектлеринден эки мингден артыкъ фахмулу сабий къатышырыкъдыла.

Къабарты-Малкъардан Нартан элден «Жулдузчукъла» деген халкъ тепсеуню юлгюлю ансамбли кесин кёргюзтюрюкдю. Аны художестволу башчысы КъМР-ни искусстволарыны сыйлы къуллукъчусу Эдик Курашевди.

Форумну ишчи программасы юч къауумгъа юлешинеди: тамата эксперт аудитория, ата-анала бла сабийле.  Кёп соруула сюзюлюрге керекдиле, аланы санында чыгъармачылыкъ жаны бла билим бериуню, къырал эм жер-жерли органланы бир бири бла байламлыкъда ишлеулери, билим берген организацияла бла ата-аналаны эм тамата спикерле бла сабийлени сёлешгенлери.

 «Программада къыркъдан кёп бёлюм барды, аладан жыйырма тёртюсю къуру сабийлеге боллукъду. Алада оюнла, лекцияла, мастер-классла бла чыгъармачылыкъ дерсле боллукъдула, - дегенди РФ-ни маданият министри орунбасары Ольга Ярилова.

- Хар бёлюм кесини форматына кёре ётерикди. Ёсюп келген тёлю аны ишине сюйюп къошулурча башламчылыкъла хазырланнгандыла, -деп билдиргенди Ольга Ярилова.

Алай  форумда билим бла технология жылгъа аталгъан викторинала, таурухла бла жомакъланы юсюнден квестле, сабийле макъамчылыкъны юсюнден игирек билирча «Основы саунд-дизайна» деген лекция, «Музей - инсанны хунерин ачыкълау жер» эм «Киногъа тюшерча не этерге керекди» деген чыгъармачылыкъ мастерскойла бардырыллыкъдыла.

Форумну ишчи кесеги 12 бёлюмге юлешинеди. Алагъа балет, тепсеу, хореография, китапханала, суратлау искусство, кино, анимация, адабият, музейле бла кёрмючле, макъам искусство, окъуу илму жетишимле, театр искусство, тёрели бла жангы медиа, цирк искусство киредиле.

Додуланы Мадина.
Поделиться: