Адамланы къутхарыуну баш борчуна санап

Ишлерине кёллери бла берилип, адамлагъа игилик келтирирге излеп кюрешгенле, айхай да, не уллу ыспасха да тийишлидиле. Бютюнда уа аланы усталыкълары адамланы саулукъларын, жашауларын сакълау бла байламлы эсе. Аллай уланларыбыздан бири Биттирланы Керимди, ол МЧС-ни Нальчикде надзор эм профилактика иш жаны бла бёлюмюню башчысыды, ич службаны подполковнигиди.

Къыйын болумла жаны бла ведомствода Керим 17 жылдан аслам заманны къуллукъ этеди. Адамланы къутхарыу жаны бла бийик билим алгъанындан сора ол Нальчик шахарда объектлени от тюшюуге къоркъуусузлукъларын жалчытыу жаны бла инспекторну къуллугъун толтуруп башлайды. Бу ишни энчиликлерине тюшюне, Керим жангы усталыкъгъа да юйренеди. 2004 жылны августунда от тюшюуге надзор этиу жаны бла къырал инспекторну къуллугъуна салыннганды. 2010 жылда Биттир улу МЧС-ни Воронежде институтун жетишимли тауусханды. 2020 жылда уа ведомствону Иваново от тюшюуге къажау-къутхарыу академияны бошагъанды, деп билдиредиле МЧС-ни регионда Баш управлениясыны пресс-службасындан.

Тюрлю-тюрлю къуллукълада уруна, Керим адамланы къутхарыу ишни сайлагъанына бир кере да сокъуранмагъанын билдиреди. «Тинтген объектлерибизде от тюшюуге къоркъуусузлукълукъну жорукълары  толтурулгъанын тохташдырсакъ, салыннган борчла тамамланадыла деп, таукел айтыргъа боллукъду. Алай эсе уа, анда от тюшмезине, адамланы жашауларына къоркъуу келмезине ийнанырчады», - дейди ол.

Быллай къуллукъда ишлеу инсандан жарашыулу болурун, адамла бла ачыкъ, шёхлукъ халда ушакъ эте, аланы жорукълагъа сакъ болургъа чакъыра  билирин излейди. Биттир улу да  тинтиулерини кезиуюнде  къаллай халат жиберилгенин, аны къалай тюзетирге боллугъун тынч, ангылашыулу айтады.

От тюшюуге надзор этиу федерал органлада ишлеген 17 жылны ичинде Керим уллу, техника жаны бла къыйын объектледе эки мингнге жууукъ тинтиу бардыргъанды. Аланы кезиулеринде ачылгъан административ бузукълукълагъа 1500 протокол жарашдыргъанды. Андан тышында, гражданланы тарыгъыуларына къарагъанды. Бёлюмге башчылыкъ эте, ишни билим бериу учреждениялада бла социал магъаналы мекямлада профилактика жумушла дайым толтурулурча къурагъанды.

 Ишчилери бла Биттир улу жумушакъды, алай салыннган борчлу тынгылы тамамланырларын къаты излейди. Коллективде да, юйюрдеча, адамланы араларында огъурлулукъ, шуёхлукъ уллу магъананы тутханын ол чертип айтады. Быллай кёз къарамны эсеби уа ахшыды – ала бир бирни ангылап ишлегенлерини хайырындан бёлюмге ышанылгъан жерде от  тюшгени бла байламлы чыкъгъан къыйын болумланы саны азайгъанды. Коллегалары бла бир тил таба билгени, ишине жууаплы кёзден къарагъаны, буюрулгъан жумушланы бет жарыкълы толтургъаны ючюн Керим ведомствону саугъаларына кёп кере тийишли болгъанды, быйыл а Баш управленияны Сыйлы къангасына салыннганды.