Россейни къоруулаучуларын ёсдюрген аналагъа – ёмюрлюк махтау

 «Аскерчини анасыны жюреги» деген битеуроссей акцияны чеклеринде Шалушкада уллу тюбешиу болгъанды. Аны Сауутланнган кючлени запасдагъы офицерлерини  "Мегапир" миллет ассоциациясыны КъМР-де  биригиую  Чегем районну  бла  Шалушканы администрацияларыны себепликлери бла  къурагъанды. Бу ишни магъанасы - аскерни бла жамауатны араларында байламлыкъланы кючлендириудю, Россейни къоруулаучусун  ёсдюрген анагъа махтау салыуду.

Ол кюн элни Маданият юйюнде Россейни Жигитлери бла тюбешиу болгъанды. Анга асыры кёп адам келгенден,  сюелирге окъуна жер  жокъ эди. Эллилени РФ-ни сыйлы лётчиги Владимир Алимов, Сочи шахарда Юнармияны штабыны башчысы Евгений Федотов, айтхылыкъ тасхачы Валерий Куков,  Москваны аскер округуну ракета аскерлерини эм артиллерияны  командующисини орунбасары Аркадий Корольков, Ингушетия Республикада  террористледен жюзле бла адамланы жашауларын сакълагъан Абубакар Костоев жокълагъандыла.

Къонакъланы араларында  уа Чегем районну башчысыны къуллугъун толтургъан Юрий Борсов, КъМР-ни Жарыкъландырыу, илму эм жаш тёлюню ишлери жаны бла  министерствосуну, Граждан обществону институтлары бла байламлыкъла жюрютюу эмда миллетлени ишлери жаны бла министерствону бёлюмлерини таматалары  Гыллыланы Мурат бла  Фатимат Бижева,  ветеранланы Нальчик шахар советини председатели Абдуллаланы Мустафа, Тиширыуланы республикалы союзуну  башчысы Аулият Каскулова, "Боевое братство" битеуроссей жамауат организацияны жер-жерли бёлюмюню председатели Гелястанланы Барисбий,  Чегем районну эмда  шахарны аскер комиссары Ахмед Мисроков да болгъандыла.

Тюбешиуню "Мегапир" миллет ассоциацияны  КъМР-де биригиуюню башчысы Аталаны Жашарбек ачханды.  Ол, быллай акцияны бардырыргъа Шалушка бошдан сайланмагъанын айтып,  мындан Уллу Ата журт урушха тёртюшер, ючюшер, экишер, жангыз жашларын  да ашыргъанла кёп болгъанларын, бир юйюрден  а беш  жаш кетип, къайтмай къалгъанларын  билдиргенди. «Аланы аналары жашларын фронтха ашырып, тылда да кеслерин аямай ишлегендиле.  Аланы алларында баш урабыз",- дегенди.         

Юрий Борсов а акцияны  магъанасы бек уллу болгъанын чертгенди. «Россейде, жууукъ тыш къыраллада да Уллу Ата журт урушну къыйынлыгъы жетмеген  юйюр болмаз. Ата журтну къоруулай, кёпле  кишиликлерин кёргюзтгендиле, ала ёсюп келген тёлюлеге юлгю болгъанлай къаллыкъдыла»,-дегенди.

Шалушканы  администрациясыны башчысы Хачим Кунижев а бир жолгъа  быллай бир жигит  бир элни да жокълагъан болмаз деп, аны бла ёхтемленнгенин жашырмагъанды. «Бери тюрлю-тюрлю жыллада Валентина Терешкова, башха космонавтла да келгендиле. Аладан сора уа  мектепни бошап чыкъгъан тёрт жашыбыз  аскер училищелеге киргендиле. Аны бла да ёхтемленебиз. Бюгюн  Россей Федерацияны тюрлю-тюрлю регионларындан кёп  жаш адамла келгендиле. Ала,  мында жашла, къызла бла танышып, андан ары шуёхлукъ жюрютюрюклерине да  ийнанама», - деп, къонакълагъа заманларын къызгъанмай келгенлери ючюн ыспас этгенди.

Дагъыда, ол акция солдатланы аналарына бошдан аталмагъанын айтып, Индияны башчысы болуп тургъан Индира Ганди халкъла аралы магъаналы жыйылыуда  Къулийланы Къайсынны аналагъа аталгъан назмусундан  тизгинлени юлгюге келтиргенин эсгергенди.

Ол кюн юнармеецлени сатырларына элде 1-чи номерли орта школда окъугъан бир къауум жаш адамны да алгъандыла. Залда олтургъанланы толкъун къарслары къагъыла тургъанлай, жашланы башларына къызгъыл бёркле кийдирилгендиле.

Сахнагъа бюгюнлюкде жашлары аскерде махтаулу къуллукъ этген анала да чакъырылгъандыла. Аланы араларында Чегембайланы Аминат, Улбашланы Лейля,  Текуланы Марина да бар эдиле. Алагъа  бюсюреу къагъытла,  гюлле да берилгендиле. 

Аулият Каскулова бла запасда офицер Аслан Тхабисимов а акцияны бардырыугъа, юйюрню, аналыкъны эм сабийликни сакълаугъа уллу къыйын салгъанлары ючюн   белгиленнгендиле.

Россейни Жигитлери да къуру  къалмагъандыла. Алагъа  спортну усталары, боксчула  Солтанланы Мурат бла Кючменланы Арсен, Ауалият Каскулова да  энчи саугъала бергендиле.

Жыйылгъанла  Аслан Тхабисимовну, шалушкачы Ирина Аришеваны,  Атажукинода кадет школну музыкалы башчысы Заур Моловну жырлагъанларына сюйюп тынгылагъандыла, ыразылыкъларын толкъун къарсла бла билдиргендиле.

"Аскерчини анасыны жюреги" деген битеуроссей акция  республикада андан ары бардырылады.  Ол Уллу Ата журт урушда Хорламны 76-жыллыгъына  аталгъан  кёп ишледен бири болгъанын айтхан эди.