Керти муслийман сагъыш этерге, халалны бла гюняхны айырыргъа борчлуду

Шёндю бир-бир шартлагъа Къыяма кюнню белгисиди, деп тохтайдыла бирле. Кертиси бла да ала бармыдыла?  Бу соруугъа жууапны Хасания элни иймамы Мисирланы Тимур хажи береди:

- Аллахутала исламны муслийманлагъа толу дин этип бергенди. Анда уа  кёп сейир  затла бардыла: адам улу жаратылгъынчы этилген,  бизни заманыбызда эмда келлик кезиуде  боллукъла. Орусча алагъа  знамения дейдиле, биз а аламатлыкъла дейик.

Аллайладан биринчисине машинаны санаргъа боллукъду. Файгъамбар, Аллахны саламы анга болсун, былай айтханды: «Мени умметими ахыр адамлары бир шинтиклеге минип келирле. Адамла андан межгитлени эшиклерини аллында тюшерле. Аланы юй бийчелери уа кийинип, алай а жалан юслю болурла».

Ол кеслери баргъан шинтикле машиналадыла. Намаз къылгъан, ийманы болгъан, алай межгитге жарты кийинип келген  тиширыуларыбыз да бардыла, жарсыугъа.  Алай, модады деп, сюйген затын юсюне къаплап жюрюрге жарамайды. Намазы къабыл болурун сюйген  динни излемлерине, Аллахуталаны буйрукъларына сыйыныргъа борчлуду.   

Мухаммад файгъамбарны (АСБ) энтта бир хадисин сагъыныуну дурус кёреме. «Адамлагъа аллай къарангы заман келир, халкъ бирге жыйылгъанда ахчалары урланыр,    межгитледе уллу сёлешиучюле болурла (микрофон). Анасындан юй бийчесини сыйын кёрюрле, атасындан нёгерин сайларла. Эр киши къатынына тынгылап, анасына эс бурмаз. Нёгерини айтханын этип,  атасы ауур кёрюнюр. Аман, билимсиз адамла оноучулагъа чыгъарыкъдыла,   гюняхлыла жамауатны аллында сюелликдиле.  Адамны сыйын жаланда андан къоркъуп кёрген кезиу келир.  Мени умметими адамлары харам сууланы халал этип ичерле. Жырлагъанла кёп болурла, къыл къобузда сокъгъанла  да жайылырла».

Бу хадис саулай бизни жашауубузну ачыкъламаймыды? Алдау кёпдю шёндюгю заманда. Билимге, адепликге багъа берилмей, сыйсызла алгъа тургъандыла.   Ангылауу, билими  болмагъаннга, ишни къатыш-къутуш этеригине да къарамай,   къуллукъну ышанадыла.  

Жырчыла жайылгъандыла, харам этген сууланы муслийманла тойлада, къууанчлада, хар кюн окъуна жюрютедиле. Къыл къобузла, былайда сёз битеу музыкалы инструментлени юслеринден барады,  асыры кёпден, атларын да билалмайса.

Энтта аламатлыкъладан бири – билмей, сунмай тургъанлай ёлюм жайыллыкъды.  «Къыяма кюн жууукъ келсе, ёлюмле кёбейирле. Аланы ичинде бир тюрлю сылтау болмай, сунмай тургъанлай ауушханла да аслам болурла». Не аламатлыкъ! Бир къарагъыз, инфарктдан, инсультдан ауушханла, кече сау-саламат жукълап, эрттенликде уянмай къалгъанла, жюреклери тохтагъанла азмыдыла?

Муслийманла кяфырлагъа ушаргъа кюреширле. Мухаммад файгъамбарны быллай хадиси барды. «Муслийманла яхудилеге бла насарадилеге ушарла. Ала кийгенни киерле,   айтханларын, этген ишлени къайтарырла».

 Яхудиле - чюйютлюле, насарадиле уа христианладыла. Керти муслийман иши, сёзю, халиси бла да исламгъа келиширге керекди. Кяфырланы, башха динлени келечилерини айтханларын, этгенлерин къайтарыргъа эркин тюйюлдю ол. Атеистлени сёзлерине тынгыламай, Къуранны аятларын, хадислени, акъыллары, билимлери болгъан алимлени  сёзлерине ийнаныргъа керекди, сокъурлача, башхаланы ызларындан бармай.  

Файгъамбар (АСБ) былай айтханды: «Аллай заман келир, адам сагъыш этмез: халалмыды, неда хараммыды къолума тюшген ырысхы, ахча». Жетген а болурму ол кезиу? Къайдан сюйсенг да ахча келтир, деп тохтайдыла шёндю юйюрледе. Ырысхы халалмыды, хараммыды, артыкъ магъаналы болмагъанчады. Алай биз сагъыш этерге, халалны бла гюняхны айырыргъа борчлубуз.

Адамла ёлюмню кёрюп болмазла, сюймезле. Ол да Къыяманы бир белгисиди. Ахча, байлыкъ асыры кёпден, ол тауусулгъунчу къоратып ариу, жарсыусуз жашарыгъына ышанадыла бирле. Уллу кёллюле, ёхтемле бу дуниягъа асыры берилгенден, кёрюп болмайдыла ёлюмню. Ала динни унутхандыла. Адамны жюрегинде Аллахы, ийманы болмаса, ол ёлюмню юсюнден сагъыш этмейди.  Алай андан бир жан да бугъуналлыкъ тюйюлдю.

 «Аллай заманла болурла, бир эр кишиге элли тиширыу  жетер»,- дегенди Мухаммад файгъамбар (АСБ). Не сейир, хар жылдан Россейде миллион адам ёледи, аладан онусундан тогъузусу – эр кишиледиле. Бу тарихле да сагъыш этерчадыла.

Энтта бир аламатлыкъны сагъына кетейик:  кийимсизле, факъырла, мискинле, малла сюрюйчюле бийик юйле ишлеп эриширле. Мухаммад айтханды: «Къыяма жууукъ келсе, адамла булутлагъа жетген бийик мекямла ишлетип, бир бирлери бла эриширле». Бир факъыргъа болушайым демей, башхалагъа эришип, юйле къаларыкъдыла.

«Къул кесине патчах табар». Бу хадисни къалай ангыларгъа боллукъду? Ана сабийине къул болур, баласы ата-анасына патчахлыкъ этер.  Бир къарагъыз тёгерекге. Баласы не сюйсе да, бир тюрлю даулашсыз аладыла, анга къуллукъ этгенлей турадыла. Аллай баладан къаллай адам ёсер? Сюйгенин жерге къондурмай тапхан артда атаны бла ананы харам этип къояр. Ол юсюне кийген, аш-суу къайдан чыкъгъанын, къаллай къыйын бла келгенин билмейди. Ислам ата-ананы сабийлени тюз ёсдюрюрге, юйретирге борчлу этеди.

«Билимлери болгъанла азайырла, ала жокъну орунуна жетерле». Шёндю адамла окъургъа, билим алыргъа сюймейдиле, тынчлыкъны излейдиле. Эки китапны да окъуп тауусмай, кеслерин алимле сунадыла, халкъны терсге бурадыла. Билим а - харкюнлюк ишди.

«Мени умметими адамлары зийнаны гюняхха санамазла»,-дегенди файгъамбар (АСБ). Жаш, къыз да ыразы эселе, некяхсыз окъуна бирге болгъан зийна тюйюлдю, деп тохтагъанланы да кёрдюк.

 «Адамны ёлтюргенни затха санамазла».  Бу заман а жетмегенмиди?

 «Битеу адамла бай болурла. Байлыкъ асыры жайылгъандан зекятны, садакъаны берирге адам табылмаз». «Алгъын кырдык, терек ёсмеген жерде ала жайылырла,  терекле битген жерледе уа жокъ болурла». Бир къарагъыз, Арап жарым айрыкам шёндю къалай жашнапды. Алай алгъын а ол къум жер болгъанды. Алай эсе уа, бу биз шёндю жашагъан ариу, Аллахутала бизге саугагъа берген сейир жерле тамбла къумгъа бурулмазламы?

«Аллах деген адам къалмаз, Къыяма кюн жууукълашса». Муслийманла азая, жокъ болуп къаллыкъдыла, Даджаль чыгъарыкъды.   Алай аны юсюнден а энчи ушакъ бардырырбыз, Аллах онг берсе.

 «Муслийманла  мушрикле болурла». Шёндю бир-бир дин къарындашларыбызны юйлерине  кирсенг, тюз кёрюннген жерде макъаны сыфаты, отоулада - суратла тагъылып. Бу неди десенг, ол манга ахча келтиреди. Ол а ширк болмай неди?  

Къыяманы белгилери энтта бардыла, алай айта келгенибиз да тамам болур сагъыш этерге, оюмла чыгъарыргъа. Бюгюн былайда сагъынылгъан аятладан,  хадиследен хайыр табып, экинчи заманнга къууанч, насып, ийман  бла тюберге Аллахутала насып берсин. Этген садакъаларыгъыз, зекятларыгъыз, дууаларыгъыз, тилеклеригиз къабыл кёрюлсюнле.