«Руссо-Балт» - сериягъа чыкъгъан биринчи автомашинабыз

Россейде биринчи болуп, аслам халда чыгъарылып башланнган автомашинаны аты «Руссо-Балт» эди. Бу машинаны аллында заводну эшиклери 1909 жылда 8  июньда ачылгъандыла. Аны кесин да жангы затла къураучула Яковлев бла Фрезе 1896 жылда ишлеген эдиле.

Ол кезиуледе Россейде талай автофирма къуралады. Эм уллуларындан бири Ригада Русско-Балтийский завод эди. Ол 1874 жылда ачылгъанды. Биз сагъыннган кюл бетли «Руссо-Балт» машинагъа эки адам сыйыннганды. Тёрт цилиндри болгъан моторуну (ат) кючю уа 24 эди.

«Руссо-Балтланы» хазыр кесекледен жыйып болгъандыла. Аланы бир-бирлерин Россейде, башхаларын а тыш къыраллада чыгъара эдиле. Алай барын да бельгиялы-орус къауум жарашдыргъанды. Алагъа башчылыкъны уа бельгиялы конструктор Жюльен Поттер этгенди.

Бу машинагъа сурам иги болгъанды. Нек дегенде ол чыдамлы эди, бузулургъа ёч болмагъанды, эришиуледе да кесин иги жанындан кёргюзтгенди. Патчахны гаражында окъуна аллай экиси бар эди. Артда уа аны аскер ведомство да алып башлагъанды.

Автомашинаны беш кёрмючде кёргюзтгендиле, ол санда 1910 эм 1913 жыллада Петербургда бардырылгъан халкъла аралы салонлада да. Барында да «Руссо-Балт» алтын майдаллагъа тийишли болгъанды.

Бир талай замандан завод ауур жюкле ташыучу машинала чыгъарып башлагъанды. Автобусланы, артиллерия эмда от ёчюлтюучю машиналаны, броневиклени бир ненча тюрлюлерин да сынам халда ишлеген эдиле анда. «Руссо-Балтны» уа, фронт Ригагъа жетгинчи, 1915 жылда июльгъа дери чыгъарып тургъандыла.