Сабийлеге къайгъырыу – ал жанында

 Бу кюнледе  Россейни Сюд приставларыны федерал службасыны  Къабарты-Малкъарда Управлениясыны башчысы  Бауаланы Ахмат  пресс-конференция бардыргъанды. Анда сёз асламысында алиментлени тёлеу не халда болгъаныны юсюнден баргъанды.

Республиканы баш сюд приставы билдиргеннге кёре, быйылны беш айына   алиментледен албугъартып айланнганла бла байламлы 3765 иш тинтиле турады.  Быйылны январь-май айларында  Россей Федерацияны УК-сыны 157-чи статьясына  тийишлиликде  137 адам жууапха тартылгъанды,  322-си административ оноу бла чекленнгендиле,   2881 инсанны  къыралдан  тышына чыгъаргъа эркинлиги,  212-сини уа  борч ючюн ырысхылары сыйырылгъандыла.

 Алиментлени тёлетиу иш бла 15 сюд пристав кюрешеди. Ала этген мадарлагъа  кёре,  жылны башындан  бери  сабийлеге 60,7 миллион сом   тёленнгенди. Болсада  республикада  эки айны ичинде алиментлерин заманында тёлемегенлени саны 1624  адамгъа жетгенди. Бусагъатдагъы законодательствогъа тийишлиликде аллай адамла  алгъа административ, андан сора уа РФ-ни Уголовный кодексине  кёре жууапха тартыладыла.

Дагъыда республиканы баш  сюд приставы  журналистлеге  алиментлени  тёлемегенлени асламысы Прохладна, Урван районладан, Нальчик шахардан да болгъанларын айтханды. Дагъыда быллай шартла келтиргенди:        сабийлерине борчлу болгъанланы асламысы жыл санлары 38-ге дери жетген эр кишиледиле – битеу да  3468 адам. Алай аллайланы араларында тиширыула да бардыла – 297.

-Биз инсанланы жууапсыз къауумуна сабийлерин кечиндирирча  ахчаны заманында тёлерлерин, алайсыз   законда кёргюзтюлген  къаты  амалла хайырланырыкъларын эсгертгенлей турабыз.  Борчу болгъанын бла къалгъанын хар адам да  ФССП-ны «Банк данных исполнительных производств» деген сервисинде  кёрюрге боллукъду, - дегенди Бауа улу.

                                                                            Холаланы Марзият.