Хыйлачыла адамланы асыры бек ийнаннганлары бла хайырланадыла

Бир кюннге Прохладна районда хыйлачылыкъ бла байламлы юч аманлыкъ иш эсепге алыннганды. Инсанлагъа этилген къоранч 232 минг сомгъа жууукъду.

Алай бла 1 июньда полициячылагъа 29-жыллыкъ тиширыу келгенди. Аны айтханына кёре, Интернетде сайтладан  биринде ол бассейн сатылгъаныны юсюнден билдириуню кёргенди. Ол аны сатып алыр мурат бла банк картасыны шартларын жазгъанды. Алай бла аны 53 минг сомун алгъандыла. Тиширыу тюкеннге сёлешгенде, анга жууап бермей тохтагъандыла.

  Благовещенское элден 56-жыллыкъ эр киши билдиргенича уа, аны телефонуна ол танымагъан биреулен сёлешгенди. Бузукъчу банкны ишчисиме деп, тюрлю-тюрлю сылтаула бла  картасыны шартларын билгенди. Артда эр киши счётундан 48 минг сом тас болгъанын ачыкълагъанды.

 67-жыллыкъ тиширыу а 130 минг сомун «саугъалагъанды» хыйлачылагъа.  Анга сёлешген  да банкны келечисиме дегенди.  Ол тиширыуну атына ким эсе да кредит алыргъа умут этеди,  ачханы къоркъуусузлугъун сакълар ючюн а картада болгъанны башха телефон номерге жиберирге тийишлиди деп алдагъанды. 

Битеу шартла бла байламлы уголовный ишле ачылгъандыла.

Республиканы хурметли инсанлары. Право низамны сакълаучула сакъ болуругъузну тилейдиле. Интернетде сайтны жарашдыргъан тынч ишледен бириди. Аны ючюн жукъ сатып алгъанда, тюкенни шартларын тинтирге керекди. Андан сора да, банкда ишлегенле телефон бла бир тюрлю операция бардырмагъанларын да эсгертедиле право низамны сакълаучула. Сизни банк картагъызны тарихлерин, пин-кодун сурасала, ахчаны башха счётха иерге керекди деселе, сизни алдаргъа кюрешгенлерине ишекли болугъуз.