Уулу ханс жокъ этиллирча

КъМР-де «Шах-шах-2021» ведомствола аралы операцияны биринчи кезиую башланнганды.  Майдан октябрьге дери кезиуде бу профилактика жумушланы беш кезиую бардырыллыкъды.

Операция наркотиклени законсуз сатыу-алыу бла байламлы аманлыкъланы тохтатыр, ала ёсген жерлени ачыкълап, жокъ этер мурат бла къуралады. Аны бардырыугъа право низамны сакълаучу органла бла бирге жер-жерли администрацияла да жууаплыдыла.

Республиканы хауа болуму наркотикли  кырдыкланы ёсюулерине хайырлыды. Иесиз ёзенледе, бирде инсанланы энчи бахчаларында окъуна шах-шах, кендирни кёрюрге боллукъду.    РФ-ни Правительстовосуну бегимин тийишлиликде уа,   уулу кырдыкланы ачыкълау эм аланы жокъ этиу жерни иесини эмда аны бла хайырланнганны жууаплылыгъындады.  Наркотикли кырдыкланы энчи комиссия жокъ этерге эркин болгъанын эсгертирчады. Аны къауумуна право низамны сакълаучула, элни, шахарны администрациясыны келечиси къатышадыла.

  Жерни иеси уулу кырдыкны кетерирге кереклисини юсюнден эсгертиуню алгъандан сора тийишли  мадарла толтурмаса,  ол административ жууапха тартылады. Быйылдан а бу бузукълукъ ючюн тазирле кёбейгенлерин айтырчады. Ол санда инсанлагъа аны ёлчеми 3-4 минг сом, жууаплы къуллукъчулагъа 5-10 минг сом, организациялагъа уа 50-100 минг сомгъа жетеди. Ол тёленнгенден сора жерни иеси уллу кырдыкны жокъ этерге борчлулай къалады.

КъМР-де МВД-ны Наркотиклеге къажау управлениясыны келечилери  республиканы инсанларын сакъ болургъа, кендир, шах-шах ёсген жерлени биле эсегиз, аланы юсюнден право низамны сакълаучулагъа неда жер-жерли администрациялагъа белгили этеригизни тилейдиле.

  Тикаланы Фатима хазырлагъанды.