Жаулары терк эримеучю ашланы битеу жашауугъузда окъуна бек аз хайырланыгъыз

Ёт  орунну  кетергенден  сора  къаллай  къыйынлыкъла  келирге  боллукъдула?  Аланы  болдурмаз  ючюн,  не  этерге  керекди? Бу соруулагъа жууапла излей, Нальчик шахарны ючюнчю номерли поликлиникасыны терапевти – гастроэнтерологу  Рахайланы Аслижан бла тюбешгенбиз.

-Ёт (желчь) бла тюрлю-тюрлю проблемалары болгъанла аз тюйюлдюле да

- Аны хатасындан аш орун, чегиле ауруйдула. Бюгюнлюкде, кереклиси  чакълы  бир  ётню  бауур  береди  –  ол  ёт  оруннга  жыйылады,  анда  иги  да  кючленеди,  адам  азыкъ  ашаса,  сокъур чегиге барады. Адамгъа операция этилген  эсе ёт орун кетерилген  эсе,  ёт  бауурдан  тюзюнлей чегилеге барады, ол себепден аны кючю азаяды. Болсада  ашны  аз-аз   ашасагъыз,  аны  эритирге жетерикди.  Ол  болумда  адам  кёп  ашаса  уа,  аш  орун  ауурланады,  къусарыгъы  келеди. Андан  сора  да,  ёт  орун  кетерилсе,  ашны  эритиучю  ферментле да азаядыла.

- Ол болумдан къутулургъа уа не онгла бардыла?

-Биринчиден, баууругъузгъа сакъ болугъуз. Ётюгюзню  кетергенден  сора  сууда неда тылпыуда биширилген ашланы ашагъыз, бек игиси уа – аланы да тартылгъанларын ашасагъызды.  Битеу  къууурулгъан, жаулу, кючлю, тузлу ашланы баууругъузну ауругъаны сау болгъунчу  къояргъа  керексиз,  эсиртиучю ичгилени да. Ол  аш орунну  да,  чегилени  да  жангы  болумлада  ишлерге  юйретирикди.  Жарым  жыл  озгъандан  сора диетаны  кенгертирге боллукъду, ашха жемишлени, тахта кёгетлени,соханны,  сарымсахны,  турманы,  лимонланы  къошмай. Чабакъны, эт кесекни къошсагъыз, аман болмаз. Алай эсе да, жаулары терк эримеучю ашланы  –  къой  этни  эм  къуйрукъну,  бек  кючлю  ашланы  битеу  жашауугъузда  окъуна  да  бек аз хайырланыгъыз.

-Ташланы хатасындан ётлерин кетерилгенледе бир кесек замандан башха органларында ташла чыгъадыла деген кертимиди?

- Ётю  болмагъан  адамны  чархында мындан ары таш къураллыкъ  тюйюлдю  деп  айтыргъа  жарамайды. Ташла ётню къурамы тюрлене  неда  ол  чайкъалмай  турса  къураладыла.  Жарсыугъа,  операция  окъуна    ётню  къурамын  тюрлендирмейди.  Алай эсе, ёт барыучу тамырларында тохтап, жангыдан ташла чыгъаргъа боллукъдула.

- Алай болмаз ючюн не зат этерге керекди?

-Ашны аз-аз, терк- терк ашагъыз. Хар  ашагъаныгъыз  ётню  чыгъыууна  себеплик  этеди,  алай не къадар терк-терк этилсе,  ёт  бир  жерде  уюмай,  ол  къадар  турады,  тамырлада  жюрюй. Бек игиси кюн сайын беш-жети  кере  ашасагъызды.  Адам  азыкъ  ашаргъа  жаланда  эки-юч  кере олтурса уа, ёт тийишлисича къатышырыкъ тюйюлдю аш орунну ишине.

Холестеринни хайырланыуну къоюгъуз. Ма  андан  къураладыла ташла. Семиз этни, сары жауну аз ашагъыз (сары жауну кюн сайын 20 граммын),  сютден этилген  ашланы  жаулары  аз  болгъанларын хайырланыгъыз.

Айланыргъа  кюрешигиз. Операция этилгенден сора эки айны ичинде  кюн сайын отуз-къыркъ минутну жияу айланыгъыз. Алай этсегиз, ёт бир жерде турмай, ишин эте барлыкъды. Сууда жюзюу да болушурукъду: суу  быдырыгъызгъа  женгил  массаж этерикди. Бассейннге ёт  орунугъузну  кетергенден  сора  жарым    жыл  озса,  жюрюрге  боллукъду.  Эрттенлик  гимнастика  да    хайырлыды.  Аны  уа  хауада  айланнганда  этерге  боллукъду.  Къарын  шаугютлени  уа  жылдан  алгъа  къатдырыргъа керек тюйюлдю.

-Дагъыда бир  къоркъуулу зат чегилени халыды бу болумда

- Ётлерин кетергенден сора бир-бир адамла ичибиз ётеди неда къатады деп, тарыгъадыла. Аны баш сылтауу – иничке чегиледе бактерияланы  мардадан  кёп  болгъанларыды.  Къалынланнган ёт, ашны эритирге себеплик этгенден сора да, сокъур чегиде болгъан микробланы къырады. Бауурдан  чыкъгъан  ёт  къарыусуз  болгъаны  ючюн  микробла  къырылмайдыла,  кёпден-кёп  бола, микрофлораны балансына заранлары тиеди.

-Бу болумдан а къалай сакъланайыкъ?

-Ашыгъызны тюрлендиригиз. Татлы ашла микробланы кёбейиулерине себеплик этедиле. Аланы  орунуна  наныкъланы,  клубниканы,  зюдюрню,  къара  ишхилдини  неда  къара  тукъузгюню  хайырланыгъыз.  Ала  заранлы бактерияланы иги къырадыла – микрофлораны кереклиси чакълы  бирде  тутаргъа  себеплик  этедиле.  Корица  бла  гвоздика  да  аллайладыла  –  алай  эсе,  аланы  ашыгъызгъа  оздурмай  къошсагъыз да игиди.

Микрофлорагъыз  тийишли  ёлчемде  болсун.  Бифидо-лактобактериялары болгъан ашланы хайырланыгъыз.

Участковый врачыгъызгъа, гастроэнтерологга  бара- бара туругъуз. Шёндю бактерияланы мардадан  кёбейиулерин  тохтатырча  иги амалла бардыла, ол санда антибактериальный  дарманла,  антисептикле.  Ала  чегиледеги  микробланы къырадыла, къаннга  уа  къошулмайдыла.  Аланы  кереклилерин  а  жаланда  гастроэнтеролог  врач  айтырыгъына сёз да жокъду.

Байсыланы Марзият
Поделиться: