Бир бири ауазларын эшитдирген жомакъла

ФСИН-ни КъМР-де Управлениясыны   4-чю номерли  колониясында тургъанла

Сабийлени къоруулауну халкъла аралы кюнюне жоралананган «Тутмакъланы сабийлерине аудиокитапла» деген битеуроссей  акциягъа къошулгъандыла. Аны магъанасы – тутулуп тургъан тиширыула алагъа жарарыкъ социал байламлыкъланы юзмезча,  ахшыны бла аманны айыра билирча этиудю.

Быллай акцияны ФСИН биринчи кере къурагъанды. Кеси да анга тынгылы хазырланнганды. Библиотеканы  фондунда  алты мингден аслам китап барды.         Акцияны кезиуюнде колониячы тиширыула балаларына кеслери сайлагъан  жомакъланы айтадыла,  «4 Кубик»   кабель телевидение уа аланы   дисклеге жаздырады. Андан сора   аудио-жазыула  сабийлерине жибериледиле.

Жомакъладан, назмуладан сора да, анала  балаларына  аланы  бек сюйгенлерини, аланы кёрюрге, къучакъларгъа бек термилгенлерини, ашыкъгъанларыны юсюнден да  айтхандыла.

  Быллай ишле  сабийлеге дунияны башында бек жууукъ эм сюйген адамларыны ауазларын эшитирге,  абыннган тиширыулагъа уа  аслам заманны сабийлерини юсюнден сагъыш этерге онг бередиле.

  «Кёлкъалды, менден узакъгъа кет!»

ФСИН-ни КъМР-де Управлениясыны  5-чи номерли  колониясыны тамата психологу  Светлана Силкина учрежденияны энчи  составы бла «Кёлкъалды, менден узакъгъа кет! Мен кесиме кесим себеплик эталлыкъма» деген ат бла  психокоррекциялы окъуула-юйрениуле бардыргъанды. Бу ишни магъанасы – жашауда тюбеген чырмауланы хорлай билиуге, колонияда къуллукъ этгенле къаллай болумлада да кеслерине тап амал табарча этиуге бурулупду.

 - Психологну дерслери не заманда да сейирлик эм тынгылы бардырыладыла, -дейдиле анга жюрюгенле. Шёндюгю заманнга тийишлиликде къуралгъан айныу эмда  юйретиу программала адамны энчилигин ачыкъларгъа, халин иги жанына тюрлендирирге, кюч- къарыу алыргъа да себеплик этедиле.

Бу  жолгъу  дерслеринде  психолог  хауа бла кёпдюрюлген шарланы хайырланнганды. Тренингге къатышханла аланы  юслеринде  сюймеген, жаратмагъан затларын жазып,  атдыргъандыла, алай бла кеслерини  ич дунияларында  болгъан тюрлю-тюрлю чырмаулагъа, кёлкъалдыларына   башха кёзден къарагъандыла. Саулай алып айтханда, бу амал къыйматлы болгъаны эмда  энчи состав бла бардырылгъан дерследе аны андан ары да хайырланып турургъа кереклиси ачыкъ кёрюнеди.

Психокоррекциялы дерслеге ыразылыгъы болгъан ким да къатышыргъа  эркинди. Ала тутмакъла бла ишлегенлеге  себеплик этериклери баямды.

 Дин экстремизмге бла терроризмге къажауду

   ФСИН-ни КъМР-де  Управлениясыны 1-чи номерли СИЗО-сунда  экстремизмге бла терроризмге  къажау мадарла къошакъ халда бардырылгъандыла. Окъутуу- юйретиу дерслени  управленияны таматасыны дин ишле жаны бла болушлукъчусу Айвар Болов, КъМР-ни Муслийманларыны дин управлениясыны келечиси Атмырзаланы Расул бла бардыргъандыла.

Тюбешиуню кезиуюнде Атмырза улу СИЗО-да ишлегенлеге экстремизмни магъанасын,  ол кесин къалай бла ачыкълагъанын эмда анга къажау не этерге боллугъун ангылатханды. Дин экстремизмни жолун кесер  ючюн адамланы патриот сезимлерин кючлендирирге, ислам, христиан, башха динлени тарыхларыны эмда магъаналарыны юсюнден билимни ёсдюрюрге, ким да кесини  ахшы адет-тёрелерин тутарча, аланы сакъларча этерге кереклисин  чертгенди.

Тюбешиуню ахырында дерсге келгенле къонакъгъа  соруула бергендиле, алагъа  тынгылы жууапла да эшитгендиле, деп билдиргендиле КъМ Р-де УФСИН-ни пресс-службасындан.

Люба Адилова.
Поделиться: