Жолда болумгъа сансыз къалмагъыз

Бу кюнледе КъМР-ни жолда жюрюуню къоркъуусузлугъуну инспекторлары пассажир транспортда аварияланы азайтыр, сабийлени къоркъуусузлукъларын сакълар мурат бла «Автобус-сабийле» рейдни бардыргъандыла. Аны кезиуюнде акъылбалыкъ болмагъанланы жюрютген транспортну техника болумларын тинтгендиле, ала тахографла бла къалай жалчытылыннганларына энчи эс бурулгъанды. Алай бла сабийлени жюрютюуге битеу излемлеге келишген машинала эркин этилликдиле.

 Алгъаракълада уа автоинспекторла «Къырал номер» рейдни кезиуюнде  эсепге салыннган тарихле кёрюнмеген, окъулмагъан жюз машинаны ачыкълагъандыла. Ол санда аладан бири жалгъан, энтта тёртюсю уа излеуде болгъанлары тохташдырылгъанды. Право низамны сакълаучула машинаны номери окъулмазча энчи мадарланы хайырланнганлагъа, къырал эсепге салмай жюрютгенлеге, законлагъа тийишлиликде, тазир салыннганын эсгертедиле.   

 Инспекторла жолда жюрюуге къатышханладан инсанлыкъ борчларын толтурурларын,  ПДД-гъа бузукълукъла этилгенлени, трассада ишекли жюрютгенлени, кеф болуп руль артына олтургъанланы кёрсегиз, сансыз къалмай, УГИБДД-гъа белгили этеригизни тилейдиле.