Россейде къаллай бир прапорщик эм полковник тиширыу барды?

 Къорууланыу министр Сергей Шойгу билдиргеннге кёре, бюгюнлюкде Россейни Сауутланнган кючлеринде къуллукъну 41 минг тиширыу бардырадыла. Аладан 44-сюню полковник чынлары барды, 30 минги келишим бла солдатланы эм сержантланы къуллукъларын толтурадыла, 7 минги прапорщикле эм мичманладыла. Алай озгъан жылны ичинде аланы саны азайгъанды, 2018 жылда ала 44,5 минг бола эдиле.

  Шойгу чертгенича, тиширыуланы араларында аскер вузлагъа конкурс эр кишиледен эсе кёпдю, бир жерге 27 адам болады. Бусагъатда министерствону Москвада пансионунда бла аны Санкт-Петербургда бёлюмюнде 1150 къыз билим ала турадыла.

   Министр айтханыча, былтыр тиширыулагъа 128 къырал саугъала берилгендиле, аладан 24-сю аскер саугъаладыла. Ведомствону майдалларына бла белгилерине дагъыда 8 минги тийишли болгъандыла. Аладан бири – энгельсчи авиабазаны башчысыны къызы Екатерина Пчела-Россейде узакъ авиацияда ишлеген биринчи тиширыу-лётчик боллукъду.

Чубайсны сабийлери не бла кюрешедиле?

   «Роснанону» халкъ узакъ 90-чы жылладан бери сюймеген башчысы Анатолий Чубайсны биринчи юй бийчеси Людмиладан эки сабийи барды. Ала балалары гитче заманларында айырылгъан эдиле. Болсада, Людмиланы айтханына кёре, Анатолий сабийлерине болушханлай тургъанды. Ол санда жашы Алексейни Великобританияда окъууун тёлегенди.

  Алексей (1980 ж.т.) Экономиканы баш школун тауусханды, талай заманны депозитарийде ишлегенди. Хапарлагъа кёре, улан заманын зауукълу ётдюрюрге сюйгени ючюн окъууда чурумла чыгъа тургъандыла. Студент заманында Алексей автогонкала бла кюрешип башлагъанды, бу жаны бла бизнеси шёндю иги барады, аны атасындан болушлукъ излемей айнытады. Ол Россейде квадроциклледе солууну да кийирип башлагъанды, артда автомобильлени да къошханды. Аны бу ишден файдасы миллионла бла тергеледи. Жаш бусагъатда Москвада атасыны фатарында жашайды.

Чубайсны къызы Ольга (1983 ж.т.) да экономика жаны бла билим алгъанды. Ол Санкт-Петербургда жашайды, уллу тыш къыраллы компанияны бёлюмюнде ишлейди. Къызы Варвара – Анатолий Чубайсны жангыз туудугъуду.

Къайсы къыралла ашарыкъланы Россейден аладыла?

    Россейни эл мюлк министри Дмитрий Патрушев билдиргенича, 2019 жылны эсеплерине кёре, агропромышленный комплексде экспорт, 25,5 миллиард долларгъа жетип, сакъланнган кёрюмдюден 24 миллиардха кёп болгъанды. Жылны планын артыгъы бла 5 регион толтургъандыла. Экспортёрланы араларында биринчи жерге Ростов область, Краснодар эм Приморский крайла чыкъгъандыла, Москва, Сахалин эм Белгород областьла уа продукцияларыны ёлчемлерин кёбейтгендиле. Быйылгъа экспорт план 25 миллиард доллар болгъанды.

  - 2019 жылда сатылгъан эл мюлк продукцияны 31 проценти мирзеу алгъанды, андан 7,9  миллиард доллар тюшгенди. Ол бай тирликли 2018 жылдан эсе азды, алай белгиленнген пландан а кёпдю, - дегенди Россейли экспорт араны генеральный директору Вероника Никишина. – Экинчи жерде чабакъ эм башха тенгиз продукция барадыла, ала экспортну 21 процентин тутадыла. Ала 5,4 миллиард доллар чакълы бирге сатылгъандыла, чыкъгъан файда 2018 жылдан 3,6 процентге ёсгенди. Къыралдан тышында сатыу-алыуда жау отрасль да ахшы кёрюмдюлеге жетгенди, бусагъатда аграр экспортда аны ёлчеми 16 процентди. Чёплеу жауну бла башха жау продукцияны сатыу, 28 процентге ёсюп, 4 миллиард доллар келтиргенди.

 Россейли продукцияны эм кёп Къытай алады – 12,5 процентин. Аны ызындан Тюрк барады, анда бизни будайны сюедиле. Аладан сора сатыу бегирек Юг Корея, Къазахстан эм Египет бла барады.