«Дунияда сабийден багъалы зат да жокъду»

Сабийлени къоруулауну халкъла аралы кюнюнде Парламентни спикери Татьяна Егорованы башчылыгъында депутатланы къаууму Прохладныйде сабий-юй интернатда тургъан балачыкълагъа къонакъгъа баргъандыла.

Биринчиден, парламентарийле учрежденияны болуму бла шагъырейленнгендиле. Интернатда уа медико-социал реабилитацияны бёлюмю ишлейди. Интернатны директору Елена Лашинаны айтханына кёре, сабийлеге медицина болушлукъ заманында эм толусунлай бериледи, аланы саулукълары, психика халлери эсге алынып.

Къонакълагъа бла сабийлеге уа ол кюн къууанчлы жыйылыу   къуралгъанды.  Аланы алгъышлай, Татьяна Егорова бу байрам артыкъда магъаналы болгъанын чертгенди.

- Дуния башында сабийден багъалы зат да жокъду. Биз сабийлени ышаныулукъларын, излемлерин толтурургъа борчлубуз, сиз насыплы болур ючюн къолдан келгенни этерикбиз. Жашауугъузда ахшы, ырахматлы, чомарт адамлагъа тюберигизни тежейме,-дегенди ол.

Интернатны коллективине да айтханды алгъыш сёзлени Татьяна Борисовна. Ала жашауларын   болушлукъ керек болгъан сабийле бла байлагъанлары ючюн ыспас этгенди. «Къыйын ишигизге тийишли багъа берилирге керекди. Мында сабийлеге керекли мадарла къуралгъандыла, медицина болушлукъ не жаны бла да бериледи. Барыгъызны да байрам бла алгъышлайма.  Бу жарыкъ кюн сабийлеге къууанч, жюрек жылыулукъ берсин»,-деп къошханды спикер.

 Ызы  бла ол къууанчлы ишни да толтургъанды. Психолого-педагогика болушлукъ жаны бла бёлюмню таматасы Елена Зайцева халкъны социал жумушларын тамамлауда жетишимлери ючюн Парламентни спикерини ыразылыгъына тийишли болгъанын билдирип, аны бергенди.

 Депутатла сабийлеге илляула саугъалагъандыла, алагъа  татлы ашарыкъла да келтиргендиле. Учреждениягъа уа  юй керекледе хайырланылгъан техника бергендиле.

Къонакълагъа ыразылыгъын билдире, учрежденияны директору Елена Лашина депутатла сабийлеге дайым да эс бургъанларын чертгенди, бютюнда уа къыйын жашау болумгъа тюшгенлеге.

Тюбешиуню ахырында Татьяна Егорова бу байрам къыралны, жамауатны эсин  ёсюп келген тёлюню проблемаларына   бургъанын чертгенди. «Бала ауруса, бир адам да анга сансыз къалмайды. Хар ким да  къаллай болушлукъ эталлыгъын сурайдыла. Хар бирибиз да жашчыкълагъа бла къызчыкълагъа сюймеклик, къайгъырыулукъ бераллыгъыбызгъа  ишексизме. Жандауурлукъ жашауубузну жоругъуна бурулгъаны къууандырады. Ол а жамауатда адамлыкъ ышанла бир заманда да жокъ болмазлыкъларына шагъатлыкъ этеди. Сабийле аурумазларын, ала насыплы болурларын барыбыз да сюебиз. Ол бизни,   ата-аналаны,  устазланы, медиклени, юйретиучюлени къолубуздан  келликди»,-дегенди ол.

Депутатла республикада ёксюз, къарар адамлары болмагъан сабийле жашагъан учреждениялагъа болушлукъну дайым да этгенлерин белгилерчады. Алагъа парламентарийле кеслерини хакъларына техника, башха керекле келтиргендиле.