Кёпюрню бла жолну жангыртадыла

Кёнделенде  «Эл жерлени комплекс халда айнытыу» къырал программагъа кёре  Хаймашагъа  баргъан жолда  жангы кёпюрню къурулушу бите турады. Аны узунлугъу   20 метрге жетерикди, саулай ишлеге уа   5 миллион сом чакълы  къоратыллыкъды.   

 

- Кёпюрню мурдору апрельни ахырында   салынып башланнганды. Бюгюнлюкде  бетондан чыпынла къуюлгъандыла, черекни жагъалары да кючлендирилирча мадар этиле турады.  Бусагъатда   специалистле   темир аркъауланы  бирге къошуп,  каркасын  хазырлай  турадыла. Ол  бир ыйыкъдан кеч къалмай жерине тюшюрюллюкдю. Объектни башы бла транспорт жюрюрча болса, Хаймашагъа баргъан жолгъа да тынгылы ремонт этилликди, - дейди Кёнделенни администрациясыны башчысы Атмырзаланы Марат. 

 

Ишлени кезиуюнде жангы тротуарла жарашдырыллыкъдыла, къоркъуусузлукъну жалчытырча темирден буруула  тартыллыкъдыла эм тийишли белгиле да салынырыкъдыла. Подряд организациядан  билдиргенлерича, объект  июнь айны ахыра битерге керекди.