Огъары Малкъарда – биринчи машина

Бу сурат  урушну аллында жыллада Огъары Малкъарда алыннганды. Ол заманда элге машина бла келген алай тынч тюйюл эди. Жолла тик, тар. Улоу  жюрюте билген, анда ишлеген да хазна адам болмаз эди. Болсада мында жигит жашла табылгъандыла. Ала Нальчикге келип, шофёр усталыкъгъа юйренип, элге машинаны  келтиргендиле. Элде уа  кёргенле бек сейирге къалгъандыла.

Биринчи болуп Огъары Малкъаргъа машинала бла киргенле  бир ненчаулан болгъандыла. Ол санда Османланы Магомет, Хулчаланы Мустафа.

Магомет урушну биринчи жылларында танкчы эди. Эки кере жаралы болуп госпитальда саулугъуна бакъдыргъанды. Артда  Къабарты-Малкъарны тийресинде  къуралгъан 115-чи  атлы аскерни санында болгъанды.  Ростов тийресинде, Большая Мартыновканы  къатында  бардырылгъан сермешледен биринде жигитча ёлгенди.

Суратдагъы жашланы юслеринден айтханда,  сол жанындан экинчиси Токълуланы Малкъарбий, ючюнчю уа Османланы Хажи-Дауутду. Урушха дери Огъары Малкъарда устаз эди. Ол СССР-ни  устазларыны биринчи съездине  къатышханды. Анда доклад да этгенди.

Сюргюнден къайтхандан сора Къарачай-Черкесде школну директору болуп кёп жылланы ишлегенди. Артда мектепге аны атын  атагъандыла.  Кеси уа Вольный Ауулда ауушханды.

Машинаны ичинде олтургъан башында сагъынылгъан Османланы Магометди. Огъары Малкъаргъа  биринчи кере трактор берген заманларында Калмыков машинасы бла ары келеди. Шофёру тардан ётерге базынмай, элге машинаны Осман  улу элтеди. Сурат ол кезиуде алыннганды.

Суратда  къыйырындагъы эки жаш а Асанланы Аскербий бла Хасауланы Хажи-Дауутдула. Суратны уа бизге Глашланы Кезибан бергенди.