Маданият юйню бла сабий садны жангыртадыла

Кёп болмай  Къашхатауда «Эл жерлени комплекс халда айнытыу» къырал программагъа кёре,  «Нюр» сабий садха бла Маданият юйге тынгылы ремонт  этип башлагъандыла.

Эсге сала айтсакъ садик 1989 жылда ишленнгенди, андан бери анга  тынгылы къаралмагъаны ючюн иги да тозурагъанды.    Бюгюнлюкде подряд организация  юйню башында эски  къанжалларын, ток баргъан чыбыкъларын,  эшиклерин, полун кетере турады, аны бла бирге жылытыучу системаны, таза эм  кир суу баргъан быргъыла да жангыртылынадыла.    

Саулай алып айтханда, тийишли  ишлеге 57 миллион сом къоратыллыкъды. График бла  ишле толусунлай быйыл 15 октябрьге тамамланыргъа  керекдиле. 

 Маданият юй да  1981 жылда сюелтилиннгенди эмда эрттеден бери ремонт керек социал магъаналы объектледен бирине саналады.   Бусагъатда мекямны башын профнастил бла жабып башлагъандыла, жангы терезеле да салгъандыла. Аны бла бирге ичинде инженер коммуникацияланы да  тартып бошай турадыла.  Ызы бла  полун бла  ич къабыргъаларын  омакъ этгенден сора  эшиклени жарашдырлыкъдыла.

 План бла ишлеге  28 миллион сом  жоюлуру белгиленеди. Объект быйыл онбешинчи октябрьден кеч къалмай  битерикди.