Предприниматель болургъа итиннгенлеге - насийхат сёзле

Монополиялагъа къажау федерал службаны КъМР-де Управлениясында, «Иш кёллю Россей» организацияны Жаш тёлю бизнес-школуну окъуучуларына «Антимонопольная служба на страже бизнеса» деген темагъа мастер-класс бардырылгъанды бу кюнледе.

Ведомствону башчысы Казбек Пшиншев, конкуренцияны эмда предпринимательлени къоруулау  службаны баш борчу болгъанын чертгенди. Андан сора да, ведомство не бла кюрешгенин туура этгенди.

Мастер-класс тири ушакъ халда бардырылгъанды. Къонакъла Пшиншевге кёп соруу бергендиле. Бегирек да бизнесни дуниясында кеслерини предпринимательство сейирлерин къорууларгъа боллугъун, багъалагъа контроль къалай этилгенин билирге сюйгендиле. Управленияны башчысы жаш тёлюню билимине бийик багъа бергенди: «Бек магъаналы соруула бересиз, темагъа сейиригиз болгъаны сезиледи», - деп чертгенди ол. – Ишни быллай акъыллы, сабыр кёз къарамыгъыз бла башласагъыз, жетишимли болуругъуз баямды».

Тюбешиуню ахырында Казбек Галимович къонакъланы: «Бизни ишибизни юсю бла болушлукъ керек болса, УФАС-ны эшиклери сизге не заманда да ачыкъдыла. Бек айтырыгъым, законнга къажау болмагъыз, ишде эмда адамла бла байламлыкълада адамлыкъ дегенни унутмагъыз, бир затдан да къоркъмагъыз», - деген насийхат сёзле бла ашыргъанды.

Сагъынылгъан организацияда Управленияны келечилери бла быллай тюбешиуле дайым бола туруучусун белгилегендиле. УФАС-ны башчысы уа Жаш тёлю бизнес-школуну окъуучуларына тийишли мастер-классланы кёп жылланы бардырады.