Банклагъа ышаныу кючленеди

Озгъан айны аллына Къабарты-Малкъарда хайырланыучула банклада тутхан ахчаны ёлчеми 53,7 миллиард сомгъа жетгенди. Былтырны бу кезиуюнде кёрюмдю бла тенглешдиргенде, ол 5,6 процентге кёбейгенди, деп билдиргендиле РФ-ни Банкыны республика бёлюмюнден.

Финанс учрежденияда айтханларыча, ёсюм асламысында организацияланы эмда предпринимательлени счётларында ахча кёбейгени бла байламлыды. Анга дагъыда эскроу-счётла да къошумчулукъ этгендиле.

Кредитлени розница халда бериу да биринчи кварталда ёсюм кёргюзтгенди: бу кезиуде адамла банкладан 9,8 миллиард сом алгъандыла. Озгъан жылны кёрюмдюсю бла тенглешдиргенде, ол кёрюмдю 23,8 процент къошханды. Ол санда бегирек да ипотека (эки кереге) ёсгенди. Быйыл биринчи кварталда хайырланыучула 2,6 миллиард сом алгъандыла.

Ипотеканы айныууна Россейни Банкыны жумушакъ ахча-кредит политикасы бла льгота программала себеплик этедиле. Банкны регионда бёлюмюню башчысы Мурат Керефов билдиргеннге кёре, озгъан жылны ичинде аны орта ставкасы 2,5 процентге тюшюп, быйыл мартда 6,5 процент болгъанды.

Саулай айтханда, ипотекагъа берилген кредитлени ёлчеми 22,5 миллиард сомгъа жетгенди. Тёлеу жаны бла да болум жарсырча тюйюлдю: адамла къайтарыллыкъ ахчаны жаланда 1,1 процентин борч этгендиле.