Аскерге кийимле эм башха керекле чыгъарыуну айныта барырча

Бу кюнледе бизни республиканы «Военторг» АО-ну генеральный директору Владимир Павлов, Россейни Къоруулау министерствосуну аскерге кийимле эмда башха керекле бла жалчытыу жаны бла службасыны таматасы Валерий Кудрявцев жокълагъандыла эмда КъМР-ни башчылары бла регионда аскерге, ФСБ-гъа, МВД-гъа, МЧС-ге, ДКС-ге  керекли кийимле чыгъарыуну айнытыуну онгларын сюзгендиле.

Аскерге кийимле тигиу бла кюрешген «ВоенТекстильПром» ООО-ну  Нальчикде, Бахсанда бла Залукокоажеде производство бёлюмлери бардыла. Алада 600-ге жууукъ адам урунады.  Нальчикдеги фабрика 800 квадрат метрден  артыкъ жерни тутады. Аны беш тигиучю цехи, дагъыда сынаучу, басм алаучу, бичиучю, хазырлаучу, оюула салыучу цехлери, башха бёлюмлери да бардыла. Аладан сора да, ашханасы, медпункту да ишлеп турадыла.

«ВоенТекстильПром» ООО фабрикада  урунуу болумланы игилендириуню, кадрла тутхучлулукъну жалчытыуну къайгъысын да кёреди: ишчилени  хакъсыз ашатадыла, медицина страхование  этиледи.

2020 жылда  бу производстводан республиканы бюджетине  200 миллион сом чакълы бир жиберилгенди, миллиард сом багъасы тёрт миллион кийим тигилгенди. Августда  жангы проект къолгъа алынырыкъды, аны хайырындан производствону ёлчеми ёсерикди, ишчи жерлени саны да 800-ге дери жетдирилликди. Предприятияла программалы амаллары болгъан шёндюгю оборудование бла жалчытылгъандыла.

Нальчикдеги предприятие дизайн эмда женгил промышленностьну колледжлери бла къаты байламлыкъ жюрютеди. Алада окъугъанла ишчи усталыкъларын ары жюрюп ёсдюредиле,  жангы тигиу оборудованияда ишлерге юйренедиле. Колледжлени да  шёндюгю заманнга келишген оборудовангиялары бардыла. Кийимле тикген фабриканы ишчилери алада студентлени юйретедиле.

Валерий Кудрявцев  фабрика чыгъаргъан продукциягъа бийик багъа бергенди эмда Нальчикни предприятиясында тигилген аскер кийимледе быйыл танк батальонладан бири 9 майда Къызыл Майданда аскер парадха къатышханын да билдиргенди.

Владимир Павлов а предприятияны продукциясы аскер бёлюмлеге деп чыгъарылгъанын эсге салып, аны качествосуна сакъ болургъа, заказны терк толтуруугъа, ишге жууаплы кёзден къараргъа кереклисин чертгенди. «Бирге ишлеуге энчи эс бурулгъаны да аны ючюндю. Нальчикдеги предприятие Военторгну бир кесегиди, аны кенгертирге белгиленеди»,-дегенди.

Къонакъла бла тюбешген кезиуде КъМРО-ни Башчысы  Казбек Коков алагъа жюрек ыразылыгъын билдиргенди. «ВоенТекстильПром республиканы бюджетине уллу къошумчулукъ этгенин да чертгенди. «Пандемияны кюч алгъан кезиуюнде ол бизге ишибизни селейтмезге, производствону ёсдюрюрге онг бергенди»,-дегенди. Республиканы оноучусу Къабарты-Малкъарда тынгылы продукция чыгъарырын сюйгенлерин айтып, производствону айнытыугъа хар жаны бла да себеплик этилирине ышандыргъанды.