Сабий поликлиника жангыртылады

Майский шахарда сабий поликлиникагъа тынгылы ремонт этиле турады. Районну жер-жерли администрациясыны башчысы Татьяна Саенко анда иш къалай баргъанына къарагъанды. Объектде аны бла бирге социал жумушла жаны бла орунбасары Ольга Бездудная эм муниципалитетни ара больницасыны тамата врачы Тимур Саральпов да болгъандыла.

Больницаны педиатрия бёлюмю кёп фатарлы юйню биринчи этажында ачылгъанлы аслам заман болады. Анга ремонт этилмегенли отуздан артыкъ жыл озгъанды. Быйыл а бу объектни Къабарты-Малкъарда саулукъ сакълау сфераны биринчи звеносун жангыртыу жаны бла къырал программагъа къошхандыла. Кёпге да созмай (озгъан айда) анда ремонт башланнганды, дегендиле районну жер-жерли администрациясында.

Россейни Президенти Владимир Путин былтыр Федерал Жыйылыугъа посланиясында къыралда битеу сабий поликлиникаланы 2021 жылда бир стандартха келиширча этерге буйрукъ берген эди. «Аяулу поликлиника» дегенни магъанасы – ырысхыны, заманны, ишге къатышханланы къарыуларын аяудады. Аны ючюн деп, врачланы эмда лабораторияланы ишлерин, сора дагъыда саусузлагъа къарауну тийишдирген амал къурагъандыла.

Ремонтну юсюнден айтханда уа, поликлиниканы бир жанында жангы (пластик) терезеле орнатылгъандыла. Шёндю уа ишчиле эски полланы къобарып, аны орунуна плитка сала турадыла.

Педиатрия бёлюмню башчысы Кристина Лабутина администрацияны келечилерине отоуланы къабыргъаларын жасаларгъа болушлукъ керекди деп сёлешген эди. Ольга Бездудная «районда сабий чыгъармачылыкъ школ барды да, аны уста суратчылары себеплик этерге угъай дерик тюйюлдюле» деп ышандыргъанды.