Хорламны байрагъы - тау башында

РусГидро компанияны бизни республикада бёлюмюню келечилери Уллу Хорламны байрамыны аллында  аны белгилер умутда Хара-Хора къаягъа ёрлеп, аны тёппесинде Хорламны эмда компанияны байракъларын орнатхандыла.

Къаяны башындан энишге къарасанг, Бахсан тары: Кёнделен, Заюково, Жанхотия - кёз аллынгда. Бу жерледе 1942 жылда кеслерин Минги тау таба атхан фашистле бла ачы сермешле баргъандыла.

Хара-Хорадан онеки километр бир жанында уа Бахсан ГЭС турады. Немислиле анга жете тургъан сагъатда, 1942 жылда 30 августда, станцияны башчылары сапёрла бла бирге аны плотинасын бла быргъыларын ишге жарамазча этгендиле. Экинчи кере уа аны къачып баргъан фашист аскерчиле чачхандыла. Алай бла станциягъа бек уллу хата жетген эди: гидроагрегатла, мекямла, щитле, токну жибериучю устройство, быргъыла, суу жыйылгъан бассейн окъуна жукъгъа жарамазча болгъан эдиле.

Къаягъа ёрлегенледен бири – Андемир Бирсов, Хорламны байрагъын орнатыу бла ала бизни ветеранларыбыз этген жигитликни эсгерирге, келир тёлюлеге жетдирирге сюйгенлерин чертгенди. Компанияны кесинде да бу байрамны энчи белгилейдиле,  эм багъалы кюнледен бирине санайдыла. Урушну кезиуюнде ГЭС-леде уруннган, аланы фашистледен къоруулагъан, ызы бла  мамыр жыллада жангы станцияланы къурулушларына къармашхан энергетиклени атларын да эсге тюшюредиле.