Баш тема – санатор-курорт комплексни айнытыу

«Иш кёллю Россей» жамауат организацияны республикада бёлюмюню келечилери Гузеланы Индира бла Мамайланы Галина алгъаракъда КъМКъУ-да бардырылгъан «Миллет умутланы эмда миллет проектлени толтурурча, Россейни къыбыла жанында медицина туризмни, реабилитацияны эмда курортологияны айнытыу» деген регионла аралы форумну ишине къатышхандыла. Анда дагъыда РФ-ни Саулукъ сакълау министерствосуну реабилитация эм курортология жаны бла миллет медицина арасыны баш специалистлери, РФ-ни рестораторларыны эмда отельерлерини Федерациясыны, СКФО-да медицина палаталаны Координация советини, КъМР-ни Курортла эмда туризм министерствосуну, санаторийлени келечилери да болгъандыла. Форумну чеклеринде Къабарты-Малкъар республиканы бу сферада айнытыу онгларын сюзгендиле.

Министр Мурат Шогенцуков регионну рекреация сферасында инфраструктураны, аны туризм эмда саулукъландырыу жаны бла онгларыны юсюнден хапарлагъанды. Россейни Саулукъ сакълау министерствосуну санатор-курорт багъыу жаны бла штатдан тышында баш специалисти Михаил Никитин а быллай багъыу эмда медицина реабилитация къалай къуралыучусу бла шагъырейлендиргенди.

Россей Федерацияда санатор-курорт комплексни айнытыу Стратегияны чеклеринде, Шимал Кавказны курортларын айнытыу къырал магъаналы жумуш болгъанын чертгенди «Реабилитация эм курортология НМИЦ» ФГБУ-ну келечиси Наталья Мачула. Аны оюмуна кёре, регионну рекреация комплексини объектлери федерал мардалагъа эмда излемлеге келиширге керекдиле. Ансыз къыралдан болушлукъ табаргъа, тийишли рынокда жетишимли болургъа амал жокъду, деп къошханды ол. Табийгъат байлыкъланы аяулу хайырланыугъа эмда курортологияны право жаны бла жумушларына да энчи эс бургъанды.

Шимал Кавказда туризмни эмда санатор-курорт комплексни тынгылы айнытыуда федерал эмда регион структураланы арасында байламлыкъланы кючлендирирге кереклисини юсюнден къонакъбайлыкъ сферада профессионал квалификация жаны бла Советни келечиси Юрий Ушанов хапарлагъанды. Стоматология эмда бет хирургия институтну башчысы, РФ-ни эм КъМР-ни Сыйлы врачы, медицина илмуланы доктору, профессор, Мустафаланы Магомед а бирлешиуню конкуренциягъа чыдамлы болур амалладан бирича кёргенин туура этгенди.

Форумну ахырында университетни ышаннгылы айнытыу арасыны башчысы, медицина илмуланы доктору, профессор Мурат Уметов КъМКъУ-ну туризм эм санатор-курорт сфералада миллет, федерал эм регион проектлени тамамлау жаны бла ишини юсюнден сёлешгенди.