Газ ызлагъа хата жетмезча

Черекле къутуруп келген кезиуде аланы жагъалары бла баргъан газ быргъыла юзюлмезча «Газпром газораспределение Нальчик» компания МЧС-ни КъМР-де Управлениясы бла бирге мадар этедиле. Бу айдан башлап, сентябрьни аллына дери компания республикада битеу газ мюлкню тинтип чыгъарыкъды. Бегирекда сагъынылгъан жерледе быргъылагъа къараргъа дейдиле. Андан билдиргенлерине кёре, быллай тийреледе 193 быргъы барды, аланы узунлугъу 11,6 километр болады. Аланы къатларында суу жагъаланы кючлендирирге, тийрелени кир-кипчикден эмда терек бутакъладан тазаларгъа умут этедиле. Керек болса, специалистле алайлада кече, кюн да дежурство бардырлыкъдыла.

Дагъыда компанияны специалистлери МЧС-ни суу кётюрюлюу бла байламлы къыйын болумланы кетериу жаны бла команда-штаб юйретиулерине къатышхандыла. Бу иш Бахсан сууну жагъасында ётгенди. Газ бла жалчытыучу компанияны атындан анга 40 адам эмда 10 машина къатышхандыла.

«Этиллик мадарланы хайырындан бу кезиуде газ ызланы къоркъуусузлу хайырланыргъа, кёк отлукъ бла жалчытыуну тыймазгъа къолубуздан келликди», - дегенди «Газпром газораспределение Нальчик» компанияны баш инженери Анзор Тутуков.