Биреуню жууапсызлыгъы кёплеге хата келтиреди

Республикада жашагъан гражданла, сора бюджет предприятияла эм организацияла быйылны биринчи кварталында хайырланылгъан электрокюч ючюн толусунлай тёлегендиле, деп билдиргендиле «Каббалкэнерго» компаниядан. Ахча бла тергегенде, битеу да 1,2 миллиард сом жыйылгъанды. Былтырны биринчи кварталы бла тенглешдиргенде, ол юч процентге (121 миллион сомгъа) аслам болгъанды.

Хайырланыучуланы бу категориялары кезиулю тёлеулерин толусунлай бергенлеринден сора ары дери этилген борчларыны талай кесегин да жапхандыла. Жашау журт-коммунал мюлк предприятияланы юсюнден а алай айтырча тюйюлдю. Ала бу кезиуде энергетиклеге жаланда 75 миллион сом тёлегендиле. Ол а кюйдюрюлген токну багъасыны 30 процентин жабады. Ары дери этилген борчларына ала энтта да 181,3 миллион сом къошхандыла.

Бу предприятияланы низамгъа тартыу ишни компания андан ары бардырыргъа таукелди. «Быллай жууапсызлыкъны хатасы ишибизге, электрокюч бла жалчытыугъа да жетеди», - дегендиле «Каббалкэнергода».