Иги урлукъ бай тирликни мурдоруду

Россельхоз араны Къабарты-Малкъарда бёлюмюнде бу кюнледе бардырылгъан кенгешде ведомствону ишини эмда аграрийлеге ол не бла себеплик этерге боллугъуну юсюнден хапарлагъандыла. Анга бёлюмню специалистлери, КъМКъАУ-ну келечилери, арендаторла эм башхала къатышхандыла.

Араны башчысы Хасанби  Куржиев жыйылгъанланы бу учрежденияда битимлени къоруулагъан къаллай агрохимикатла эмда биопрепаратла жарашдыргъанлары эмда аланы хайырланыуну къыйматлылыгъы бла шагъырейлендиргенди. «Бу продукцияны бары да сертификацияны ётгенди. Биз КъМКъАУ бла бирге «Саулукълу тирлик+7» деген агрохимикатны хайырланып тамамлагъан иш ючюн «Алтын кюз» кёрмючде алтын майдалгъа тийишли болгъанбыз», - дегенди ол.

Университетни келечиси, профессор Лиуан Хажметов да белгилегенди аны, Араны бёлюмюню специалистлерине аны ючюн ыразылыгъын билдиргенди. Дагъыда быйыл сынам халда сабанлада башха препаратланы да хайырланып кёрюрге сюйгенлерин туура этгенди.

Бёлюмню башчысыны орунбасары Зарема Бегидова республикада мюлкледе фитосанитария тинтиуле къалай бардырылгъаны бла шагъырейлендиргенди. Саулай айтханда, учрежденияны специалистлери бу ишни 315,8 минг гектарда бардырадыла. Кюзлюкле ёсген сабанланы да хатасы жокъду. Алай дагъыда аграрийле аланы тюрлю-тюрлю аурууладан сакълау жаны бла мадар этерге керекдиле. Бу ишде, Бегидова оюм этгенича, Псевдобактерин-2 эм «Саулукълу тирлик+7» препаратланы хайырланса иги боллукъду.

Кенгешде айтылгъаныча, быллай препаратланы жаланда тийишли тюкенледе алыргъа керекди. Нек дегенде  аланы жалгъан тюрлюлерин сатыу кенг жайылгъанды. Бирде аладан тёртден бири жукъгъа жарамагъан затла болуп да чыгъадыла. Ишеклик болса уа, препаратны Россельхоз араны токсикология лабораториясында тинтирге амал барды.

Бёлюмню специалистлери урлукъну качествосуна да уллу эс бурадыла. Фитоэкспертиза этип, алада заранлы затланы къыргъан эмда ёсюмге себеплик этген препаратланы сайлайдыла. Хазыр урлукъну сатып алгъанда уа, аны хар несин да лабораторияда тинтирге чакъыргъандыла.

Россей мирзеуню къайсы къыраллагъа сатыучу эсе да, аланы излемлерине кёре тинтиулени жик-жиги бла тындырыргъа кереклисин чертгенди Зарема Бегидова. Сёз мында карантиннге тийишли заранлы къурт-къумурсхаланы мониторинг этиуню юсюнден барады. Дагъыда хайырланылмагъан эл мюлк жерлени тизмесин къурауну, сабанлагъа от тюшмезча кёз-къулакъ болургъа кереклисини, пестицидледен къалгъан орунланы къоркъуусузлу жарашдырыуну юсюнден да сагъыннганды ол.

Учрежденияны таматасыны орунбасары Къурманланы Алим жыйылгъанлагъа республикада мюлкледе урлукъ бла жалчытыу не халда болгъанын, аны себиу къалай баргъанын да билдиргенди. Тарихлеге кёре, мирзеулюк эмда жаулу битимлени урлугъу бла ала толусунлай жалчытылыныпдыла, нартюх урлукъдан а артыгъы бла окъуна къыстырыкъ этилгенди.  

Кенгешни ахырында къонакъла бёлюмню лабораториясына эмда агрохимикатла чыгъарыучу цехине къарагъандыла. Информация-консультация пунктда сабанлада фитосанитария болум бла шагъырейленнгендиле, тахта кёгетлени, жемишлени, гюллени эмда айбатлы юлкюлени ёсдюрюу эмда къурт-къумурсхаладан бла аурууладан сакълау амалланы юсюнден билим алгъандыла. Анда окъуна битимлени къоруулагъан химия эм биология препаратла, семиртгичле, тюрлю-тюрлю урлукъла сатып алыргъа онг бар эди.