«Элни хунерли, саулукълу жаш тёлюсю мындан ары да спортда жетишимли болурларына ийнанама»

Мёчиланы Маликни жашы Магомет Хасания элни 16-чы номерли  орта школунда физкультурадан устаз болуп ишлейди. Кеси да устаз юйюрденди. Атасы Малик, жаннетли болсун, кёп жылланы  школгъа директорлукъ этип,  бет жарыкълы ишлеп тургъанды.  Анасы  Любовь а  кёп сабийни орус тилни  бла адабиятны сейир дунияларына тюшюндюргенди.  Бусагъат заманда аланы элде ариу сёз бла эсгередиле.

- Тёрели соруу: школгъа къалай келгенсе?

–Устаз боллукъма деп акъылымда да жокъ эди. Жашау а устазлыкъгъа тюшюрюп къойгъанды. 1995 жылдан бери толу 25 жыл ишлейме сабийле бла. Университетни 3-чю курсунда окъуй тургъанымлай, 16-чы школда бир кесек ишлерге чакъырадыла. Ол сагъатда эсимде да жокъ эди устазлыкъ жолунда аллай бир жыл къаллыгъым. Бюгюнлюкде тутхан ишими бек сюеме.

Сабийлигимден да  спортну бек сюе эдим. Дзюдо бла 7 жыл, бокс бла 6 жыл кюрешгенме. Кёп тюрлю эришиуледе  кесими ауурлугъумда алчы болгъанма. Анга шагъатлыкъ этген майдалларым, грамоталарым  бюгюн да юйде сакъланыпдыла.  Дзюдодан, боксдан да спорт устасына кандидатма.

- Физкультурадан энчи нормативлени толтурургъа тийишлиди, окъуучула аны эталамыдыла?

– Энди,  Аллахны ахшылыгъындан,  бизни элде, Хасанияда, сабийлерибиз саулукълуладыла. Бары да бирча нормативлени кёргюзтедиле деп айтсам, ётюрюк боллукъду, алай кёбюсю уа тамамлайдыла. ГТО-ну алтын майдалгъа толтургъанлары да кёпдюле. Былтыр окъунча Сарбашладан эки жашчыкъ алтын майдалла алгъандыла. Андан сора да, нормативлени жетишимли толтурсанг, ЕГЭ-де юч-терт балл къошулады.  

- Спортну къайсы тюрлюсюне бегирек эс бурулады элде?

- Хасанияда бокс энчи жерни алады, спортну устасына кандидатла да кёпдюле. Ол да Геляланы Малик бла аны жашы Ибрагимни хайырындан  сунама. Ала аламат тренерледиле. Битеу элни чирчигин ариу ызгъа саладыла.

- Сени сабий заманынгы бла бюгюнню заманны тенглешдирсек, школда тюрлениуле эслеймисе?

– Жашауубуз мурдору бла да тюрленнгенди десем, ётюрюк болмаз. Ол себепден школда да уллу башхалыкъла бардыла. Бизни заманыбызда ата- аналарыбыз устазны даражасын бек бийик кёре эдиле. Сабийле да аны айтханындан чыкъмагъандыла. Бусагъатда уа сабийлени кёбюсю аталарына, аналарына окъуна тынгыламайдыла, башхагъа уа къалай тынгыларыкъдыла? Абаданланы кёбюсюню сабийлерине тийишлисича эс бурургъа заманлары окъуна жокъду, ала да кеслери аллына къалып, не сюйселе аны этедиле. Ол жумуш а къуру устазланы инбашларына таяныргъа керек тюйюлдю… Аллай тюрлениулени мен игиге санамайма.

- Дерслени бардырырча спорт оборудованиягъыз,  инвентарыгъыз а кереклисича жетишемиди?

– Бизге керек оборудование бла толу жалчытылыныпбыз. Баскетболгъа, футболгъа, волейболгъа топла бардыла. Жаланда волейболгъа керекли топла терк тозурап, бир  кесек къыйналабыз.

- Къаллай спорт секцияларыгъыз ишлерин бардыргъанларын да билдирсенг эди?

-Дзюдодан секцияны ишин аламат спортчубуз Гуппойланы Алина бардырады. Къыз сабийчиклени кёбюсю анга жюрюйдюле.

Сора Къараланы Аслан карате секцияны элтеди. Анга да къыз сабийчикле кёп жюрюйдюле.  Эркин тутушуудан спорт школда юч-тёрт тренер бардыла. Боксдан Геляланы Малик бла Къартлыкъланы Ибрагим кюрешедиле. Бизде футбол секция жокъ эди да, энди 8-чи школну къатында жангы футбол майдан ачылгъанды, тренер да алгъандыла, сабийлерибиз юйренирге ары да жюрюрюкдюле.

Школда волейбол, баскетбол командаларыбыз болуучу эди.  Былтыр волейбол бла кюрешдирип тургъанма, быйыл а пандемия бла байламлы   алыкъын команда жыялмагъанма. Волейболну жаш тёлюбюз бек сюеди. Сёз ючюн, бизни школну бошап чыкъгъан жашладан командала къуралып,  ингирден ингирге бек сюйюп келип, ойнап тургъандыла. Шёндюгю болумлада ол тохтапды.  

Не этериксе, адам кесин сакъларгъа керекди. Белгилисича, спорт бла кюрешген инсан саулукълу болады да, хар нени да хорларбыз, заман да тюрленир деп ышанабыз. Хасанияны саулукълу, фахмулу, хунерли да жаш тёлюсю мындан ары да спортда жангы  жетишимле болдурлукъларына ийнанама. Мен да, къарыуум жетген къадар, ишими бардырыргъа кёлленипме.

Ушакъны Додуланы Мадина бардыргъанды.