Уруш жолла бла - Венагъа дери

Уллу Хорламны 76-жыллыгъына

«За отвагу» деген майдал  не заманда тохташдырылгъаныны, аны бла кимле саугъаланнганларыны юсюнден материал хазырлай тургъан заманымда бизникиледен а аны бла кимле саугъаланнган болурла деп излегенме да, кёплени тапханма. Аланы араларында уа Махийланы Беппону жашы Георгий да бар эди. Ол аны бла эки кере окъуна саугъаланнганды.

Георгий 1942 жылда чакъырылгъанды аскерге. 54-чю жаяу аскер полкга тюшеди да, анда 82-миллиметрлик миномёт расчётну наводчиги болуп турады. «Кавказны къоруулагъаны ючюн» майдал бла да саугъаланады.

1943 жылда уа полку бла бирге Ростов областьны Аксай эмда Новочеркасск шахарларын, ызы бла Волошировградны эм Донецкни азатлау ючюн сермешлеге къатышады.

Къачып баргъан фашист аскерле ызларына кёп минала салгъандыла. Аланы табаргъа эм кетерирге керек эди.  Ол кюнледе Махий улун 207-чи сапёр батальоннга кёчюредиле. Солдат тенглери блап ол Днепропетровкс, Кременчуг, Ровно шахарланы орамларында, майданларында, юйлени тёгереклеринде салыннган миналаны кече бла кетерип, къызыл аскерчилеге жол ача эди.   

Сапёрла, миналаны кетергенлери бла къалмай, немислиле бла къызыу сермешле да бардыра эдиле. Кюнлени биринде, Днестр суудан ётгенлей, Лещанск элни къатында фашистле  бизникилени сауутлары сакъланнган складланы чачдырыр умут этедиле. Сержант Махийланы Георгийни башчылыгъында сапёрла, складладан немислилени къыстап, миналаны да кетередиле.  «За отвагу» деген биринчи майдалын ол ма анда этген жигитлиги ючюн алгъанды.

Батыр жаш Молдавияны, Румынияны, Венгрияны да азатлаугъа къхатышханды. Будапешт шахарны тийресинде  Дунай черекден ётгенден сора  Баш командующисини буйругъу бла махтау грамотагъа да тийишли болгъанды. «Будапештни азатлагъаны ючюн» деген майдал бла да саугъаланнганды.

Георгий жаралы болуп, госпитальгъа да тюшгенди. Андан чыкъгъандан сора дагъыда фронтха кетгенди. Чехословакияны Трнава, Глоговец, Сенец шахарлары ючюн сермешледе этген батырлыгъы ючюн дагъыда бюсюреу грамотагъа тийишли болгъанды. Братислава ючюн къазауатда эки нёгери бла фашистле тургъан жерге барып, ичинде шофёру бла да машинаны сюрюп кетгенди. Артда белгили болгъаныча, анда магъаналы къагъытла бар эдиле. Ол жигитлиги ючюн  анга «За отвагу» деген экинчи майдал бериледи.

Уруш жолла бла таулу жаш Австриягъа дери баргъанды. 1945 жылны октябрь айында аскер къуллугъун бошагъанды. Андан ары жашау жолундан а хапарыбыз жокъду. Ким биледи, жууукъларындан биреу окъуна бу материалны окъуса, бизге аны андан ары къадарыны юсюнден билдирир деген умутдабыз.  Дагъыда аллай жигитлени халкъ эсинде тутаргъа керекди деп, алай къарайбыз.