Магъаналы дерс. Электрокючню юсюнден сабийлеге толу хапар

«Россети Шимал Кавказ» компанияны КъМР-де бёлюмюню – «Каббалкэнергону» келечилери «Тейри къылыч» сабий реабилитация арада солугъан школчула бла тюбешип, электрокючню къоркъуусузлу хайырланыуну юсюнден дерс бардыргъандыла. Специалистле сабийлеге къонакъгъа ток ургъандан сакълагъан энчи юс кийимле кийип келгендиле. Башларында къызыл, жылтырауукъ каскалары, къолларында жарагъан къол къаплары. Кеслеринде да абериде ток болгъанын билдирген, жомакълада жигитлени къамаларына ушаш аллай приборлары.

Быллай къонакълагъа сабийле бек уллу эс буруп тынгылагъанларына сёз да жокъду. Жюзден артыкъ школчу электровикторинагъа, электрокюч ургъан адамгъа биринчи медицина болушлукъ къалай берилген жумушха да тири къатышхандыла. Экинчисин энергетикле «Гоша» деген манекенни юсюнде кёргюзтгендиле. Специалистле ток ызланы чыпынларына ёрлерге, аланы къатларында телефон бла суратха тюшерге, трансформатор подстанциялагъа кирирге жарамагъанын айтхандыла, ол бек къоркъуулу болгъанын чертгендиле. Школчула каскаланы, къол къапланы кийип кёргендиле, энергетикле бла суратха тюшгендиле. Ала уа сабийлеге электрокючню къоркъуусузлугъуну юсюнден китапла бергендиле.

«Гитчелеге дайым эс буруп тургъанлары ючюн компаниягъа ыразылыгъыбызны билдирирге сюебиз. Быллай дерсле алагъа бек магъаналыдыла, аланы хата-палахладан сакъларгъа уллу себеплик этерикдиле деп ышанабыз», - дегенди санаторийни билим бериу бёлюмюню башчысы Глашланы Зухура.