Айырмалы медиклеге – махтау, сый да

РФ-ни  ФСИН-ини КъМР-де  Управлениясыны  медицина подразделенияларында  ишлеген врачла,  фельдшерле, медсестрала, лаборантла 14-чю апрельде  байрамларын белгилегендиле. Аны  1829 жылда  апрель айда  патчах Голицин тохташдыргъанды.  Бусагъатда хар  пенитенциарный учрежденияда тутмакълагъа деп ишленнген  энчи  больницалада бёлюмле, филиалла бардыла.

УИС-леде къуллукъ этген медикле  тутмакълагъа керекли диспансер тинтиу, профилактика къараула,  амбулатория багъыу амалны да хайырланадыла. Керек болса уа , ауругъан адамны    къырал багъыу учреждениялагъа элтедиле.

Пенитенциар медикле тутхан  ишлерине жууаплы кёзден къарауларыны хайырындан  тутмакъланы араларында  ауругъанланы саны иги да азайгъанды.

Тюрмеледе медицинада ишлегенлени жумушлары тынч тюйюлдю, аны бла бирге уа жууаплыды.  Аны себепли  врачла, медсестрала, лаборантла, фельдшерле да билимлерин дайым кётюргенлей турадыла. Ала не къадар терен  билимли болсала, адамны жашауун  ёлюмден къутхарыу да аллай бир  хайырлы   боллукъду.

Бизни республикада орналгъан   7-чи номерли  медицина -санитар часть  жаланда Къабарты-Малкъарда  тутмакъланы саулукъларына къарау бла чекленип къалмайды. Аны больницасына    Север Осетия-Аланияда, Къарачай-Черкес, Ингушетия, Чечен   республикалада да тутмакълада тургъанлагъа багъадыла.  Андан сора да , учрежденияны   13 филиалы ишлейди,  аладан 8 алыкъа ишлери сюдлюк болмай, алай жууапха тартылгъанланы медицина жумуш  бла жалчытады. Больницада уа бир жолгъа 104   адамгъа багъарча онг,  жер да  бардыла.

Сёзсюз, ырысхы-техника базаны игилендириу жаны бла да иш дайым бардырылгъанлай турады.  Арт бир ненча жылны ичинде  больницада кёп зат тюрленнгенди. Анда хирургия, урология, дерматовенерология, офтальмология, оториноларингология эмда  трансфузиология жаны бла багъыу амалла  кийирилгендиле.

Рентгенодиагностика оборудование да жангыртылгъанды. Озгъан жылны апрель айында уа Север Осетия-Алания эмда Къарачай-Черкес республикалада  филиаллагъа деп   эки флюорография  диагностика комплекс эмда  больницагъа  ИВЛ аппарат алыннганды.

Больницаны кёп бёлюмлерине капитал ремонт этилгенди. Учрежденияда  врачладан бригадала къуралып ишлейдиле. Аланы кючлери бла  ультразвуковой тинтиу  эмда  фиброгастродуоденоскопия  этер амал барды.

КъМР-ни Саулукъ сакълау министерствосу, Роспотребнадзор да медицина учрежденияны кереклерине болушлукъ этерден артха турмайдыла.

Дагъыда Россейни ФСИН-ни КъМР-де Управлениясы  кёп тийишли  министерствола, ведомствола бла келишим этгенди. Аладан да, керек болса ,болушлукъ келеди.

Байрамгъа аталып, УФСИН-де къууанчлы жыйылыу болгъанды. Аны кезиуюнде  медицинада  ишлеген бек игилеге  ведомствону саугъалары берилгендиле.

 

Холаланы Марзият. Суратда: врач Байтуугъанланы Жулдузну больницаны филиалыны начальнигини орунбасары Марат Эльгаров саугъалагъанды.
Поделиться: