Умутландыргъан атламла

Газаланы Борис бла Люля  эки къыз бла бир жаш ёсдюредиле. Сабийле Нальчикни 24-чю номерли мектебинде ахшы окъугъанларындан сора да, спорт бла да кюрешедиле.  Ала «Восточный ветер» деген аскер искусстволаны школуна жюрюйдюле, тренер Заур Карамурзовда ушудан жарау этедиле. Артыкъда жетишимлери бла Халимат айырмалыды.

Къызчыкъгъа 10 жыл толгъанды, алай  хорламлары аны жыл санына кёре бардыла.

2020 жылда сентябрьде аскер искусстволадан III Север-Кавказ оюнлада «Гунь-Шу, Чань-Цуань» категорияда кесини дисциплинасында ол  биринчи жерни алгъанды. Анда аны майдал эм диплом бла саугъалагъандыла. Ызы бла Уллу Ата журт урушну 75-жыллыгъына аталгъан аскер искусстволаны «Альборц» деген фестивалына къатышханы ючюн къызчыкъгъа Айкидону Шимал Кавказда федерациясындан диплом берилгенди.

Проект эм тинтиу ишлени «Илмугъа биринчи атламла» деген республикалы конкурсунда да «Саулукълу сабийле – туугъан жерибизни байлыгъы» номинацияда 1-чи жерни алгъанды. Окъуучу ишин «Ушу – тынчлыкъгъа бла саулукъгъа жол» деген темагъа хазырлагъанды, проектни таматасы Ирина Шахалиева болгъанды. Эришиуню эсеплерине кёре,  «КъМР-де башланнган классланы окъуучуларыны проект эм излем ишлери» деген жыйымдыкъ басмаланнганды, анга Халиматны жазгъаны да киргенди.   Алай бла хунерли къызчыкъдан жаланда  спортда угъай, илму-излем ишде да энтта жетишимле сакълайбыз.