Маданият юйге тынгылы ремонт этиледи

Бу кюнледе  «Маданият» миллет проектге кёре  Огъары Малкъарда той-оюн бардырылыучу мекямгъа  тынгылы ремонт этип башлагъандыла. Эсге сала айтсакъ, мекям 1964 жылда сюелтилиннгенди.  Онбеш жылны ичинде анга арталлыда къаралмагъаны себепли  тозурап осалына кетгенди.  Тынгылы ремонт  къайсы заманлада  этилгенин а айтыргъа  окъуна къыйынды.  

Бюгюнлюкде къурулушчула  аны агъач полларын, терезелерин, эшиклерин  эм юйню башында агъачлары бла шиферлерин  кетере  турадыла. Ызы бла мекямны къабыргъаларын, мурдорун кючлегенден сора, ток чыбыкъланы, таза эм кир суу  баргъан быргъыланы, жылытыучу системаны   тартырыкъдыла. Сахна да жангы излемлеге келиширикди.  Поллагъа, башха жерлеге да  омакъ плитка салынырыкъды.  Эшик, терезе эм башха абериле да   жангыртыллыкъдыла.   Маданият юйню  арбазы да  айбатланырыкъды,  атлауучларында  сакъатлагъа пандус  ишленирикди.

Саулай алып айтханда, къурулуш ишлеге 20 миллион сомдан аслам   ахча къоратыллыкъды. Ол  федерал,  республикалы эм  жер-жерли бюджетден бёлюннгенди.