Жангы юй алгъанда алданмазгъа сакъ болугъуз

Юйню, фатарны сатыу-алыу бла байламлы ишле бла, баям, кёплеге кюреширге тюшеди. Алай былайда  алданмаз  ючюн, эссизлик этерге жарамайды. Юридический жаны бла не этерге кереклисини юсюнден бизни бла ушагъында адамланы эркинликлерин къоруулау бла кюрешген «Правовая защита» регион организацияны юристи Бекхан Ужахов айтханды. Алай бла фатар алгъанда агентстволаны, нотариусланы эм юристлени болушлукълары бла хайырланыргъа боллукъду. Аланы хар бирин да энчи тинтейик.

Агентствола: неге эс бурургъа керекди?

Ахыр жыллада сатыу-алыу рынокда агентстволаны магъаналары жангызда  уллу шахарлада угъай, бизни республикада да ёсе барады. Алай былайда бек сакъ болургъа тийишлиди. Нек дегенде биркюнлюк фирмала, жалгъан юридический офисле аслам жайылгъандыла. Аллайлагъа «тюртюлмез» ючюн, организацияны уставына, регистрация этилгенине шагъатлыкъ  документлерине къарагъыз, ол къаллай бир заманны ишлегегин да сураргъа унутмагъыз.

 Эсгертиу: документлени копияларын берселе, унамагъыз, ол сизни законлу эркинлигигизди. Аланы бермегенлери уа – фирма жалгъан болгъаныны биринчи шартыды. Сертификацияны ётген агентствону специалистлери дайым усталыкъларын ёсдюргенлей, энчи программала бла билимлерин жангыртханлай туруучудула. Сертификациялары болгъан фирмаланы тизмеси уа Россейли риэлторланы гильдиясында эм аны Интернетде сайтында жазылыпды.

Нотариусла: игиси  эм аманы

Келишимни нотариусну болушлугъу бла тауусуу эм къоркъуусузгъа саналады. Аланы барысына да страхование этиледи. Нотариус битеу этген ишине законну аллында жууаплыды. Ол юйге арест салыннганын бла къалгъанын  неда ол залогдады дегенча чуруму болмагъанын билир ючюн  тинтиуле бардырады, нотариал ишлени реестринде келишимни эсепге салады. Сора документ эки экземплярда сакъланады, аладан бири нотариусда къалады. Алай бла сиз бир тюрлю сылтау бла къагъытларыгъызны тас этсегиз, аланы копияларын андан алаллыкъсыз.

Нотариусну ишини бек уллу кемчилиги – аны багъасыны уллулугъуду. Ол документлени жыйып айланмайды, аны бла сиз кесигиз кюрешириксиз. Сора ол жалгъан  бланкны хайырланады дегенча ишеклигигиз бар эсе, Нотариал палатада болушлукъ излерге боллукъсуз. Анда битеу бланкланы юслеринден  билдирликдиле.

Сизге ёкюл болуша эсе

Юрист къаллай документлени жыяргъа кереклисин ангылатырыкъды, аланы жалгъан бла керти болгъанларын айырыргъа юйретирикди. Келишимни тауусуу бла байламлы къоранчларыгъызгъа, сизге юйню сатхан адам андан болжалдан кеч къалмай кетерине къарарыкъды. Андан сора да, ол фатарны алгъыннгы иелери коммунал жумушла ючюн борчлары сизге къалмаз ючюн да кюреширикди, ала юйню сатаргъа сокъурансала, болушурукъду. Жангыз да бийик квалификациялы ёкюлню табаргъа керекди.

Алданмаз ючюн, талай эсгертиу

Сизге юйню сатхан адамны налог аз чыгъар ючюн келишимде юйню багъасын  белгиленнгенден эсе аз  жазайыкъ деген тилегин къабыл кёрмегиз. Ол артда аны бузаргъа умут этсе, сиз ахчагъызны келишимде кёргюзтюлмеген  кесегин къайтараллыкъ тюйюлсюз. Фатарны ичинде  законсуз тюрлениуле  этилген эселе да, аны ючюн, жангы иеча, сиз жууаплысыз. Ол себепден  анга да эс буругъуз.

Юйню алып башлагъанлай окъуна, анда жашагъан битеу адамла «выписаться» этсинле деп къаты болугъуз. Аны иеси не тюрлю сылтау бла да заманны соза эсе (асламысында ала бусагъатда башха барыр жерибиз жокъду деучюдюле), келишимге къол салыргъа, ахчаны берирге ашыкъмагъыз. Нек дегенде быллай болумлада сюдле асламысында аны алгъыннгы иеси жанлыдыла. Ала анга сизни ахчагъызны къайтарыргъа буюрсала да, аны саулайын бир кереге угъай, акъырын-акъырын къайтара турургъа эркинлиги барды. Ол а он  жыллагъа созулургъа боллукъду.    

Юйню алып, юридический жаны бла битеу жумушланы тамамлагъандан сора, Юстицияны управлениясында регистрацияны мычымай ётюгюз. Ансыз сиз аны иесине саналмайсыз. Бу жумушлагъа 15-30 кюн кетерге боллукъду. Ма  андан сора сизге жангы фатаргъа эркинликле толусунлай берилликдиле.