Акъ-Суугъа улоула жангы низам бла жюрюрюкдюле

Кёп болмай Нальчикни мэриясы бла адамланы ташыгъан транспорт предприятияланы бир къаууму  арада келишим табалмагъанлары себепли  Акъ-Суугъа 13, 13а эм 25-чи  номерли  улоула  жюрюмей тохтагъандыла,  деп билдириледи  шахарны жер-жерли  администрациясыны пресс-службасындан.   

Эсге сала айтсакъ, маршруткала   борчларын тийишли халда толтурмагъанларына  алгъаракъладан бери жамауатдан   аслам тарыгъыу келе тургъанды.  Аланы  кёбюсю графикге кёре жюрюмегенлери бла байламлы болгъандыла. Бузукълукъланы  ингир кезиюуде этилгенлери уа   бютюн бек  жунчутханды. Аны бла бирге,  транспортну   тозургъаны,   къоркъуусузлукъну излемлерине  келишмегени да  айтыла тургъанды.   

Белгилисича, сагъынылгъан  маршрут ызла узун болгъанлыкъгъа,  адам аз жюрюйдю. Ол а водительлеге артыкъ файда келтирмейди. Анга кёре, пассажирле кёбюрек жыйылырча ала заманны созаргъа,  расписаниядан кеч къалыргъа тюшедиле.  Кемчиликни кетерирча, маршрутну схемасын тюрлендирип да кёргендиле, алай ол да уллу хайыр келтирмегенди. Улоула азыракъ жюрюселе, адамлагъа  къыйын боллукъду.  Ала эрттенликде тогъуздан ингирде онжети сагъатха дери  бир бири ызындан отуз минутдан кеч къалмай барыргъа тийишлидиле. 

Сагъынылгъан проблеманы  сюзерча мэрияда  «Ралли-спорт» биригиуню эмда элни  келечилери да къатышып тюбешиу ётгенди.  Болсада мында белгиленнген   жангы излемлеге предпринимательле ыразы болмагъандыла эм кеси ыразылыкълары бла   13, 13а эм 25 маршрут ызланы къайтарып ишлерин тохтатхандыла.

Мэрияда айтханларына кёре, жууукъ заманда  Акъ-Суугъа жюрюрча жангы перевозчик айырыллыкъды, ол санда адамлагъа тап болурча  низам  да игилендирилликди.

 

Магометланы Сулейман.
Поделиться: