Суратларында – тиширыуну жарыкъ дуниясы

Нальчикде Маданият фондда КъМР-ни Художниклерини союзу хазырлагъан кёрмюч ачылгъанды. Ол Тиширыуланы халкъла аралы кюнюне жораланнганды.

- Быйыл биз бу жыйылыуну байрамдан сора къурагъаныбызны сылтауу малкъар халкъны кёчгюнчюлюкде азап чекген адамларын эсгериуню кюню бла байламлыды, - дегенди Къабарты-Малкъар Республиканы Художниклерини союзуну председатели Геннадий Темирканов.

Маданият фондда онтёрт суратчы  тиширыуну ишлери кёргюзтюледиле. Авторланы ишлери да кеслерини энчиликлери бла сейирдиле. Аланы араларында жаулу бояула, карандашла бла ишленнген, къолдан устала этген затланы да кёрюрге боллукъду.

 Геннадий Темирканов билдиргеннге кёре, КъМР-ни Художниклерини союзуну членлерини ишлеринден къуралгъан кёрмюч Чегем шахарны Маданият юйюнде да ачылгъанды. Атлары айтылгъан художниклени араларында республиканы интернатларында кечиннген сабийлени, санларында сакъатлары болгъанланы чыгъармаларын кёрюрге да боллукъду. Суратланы кёп болмай Кисловодскда, ызы бла уа Къарачайны бир ненча районунда кёргюзтюп, Владикавказгъа да элтирикдиле, дегенди ол.

- Бу жол кёргюзтюлген жарыкъ бетли, ариу суратла да Тиширыуланы халкъла аралы кюнюне жораланып, къараучуланы къууандыра, Маданият фондну залын жасагъандыла. Мында белгили художникле  Сияра Аккизованы, Абайланы Асиятны, Виктория Ванниеваны, Текуланы Динаны, Милана Халилованы, Евгения Эркенованы дагъыда башхаланы ишлери кёргюзтюледиле. Кёрмюч мартны ахырына дери бардырыллыкъды, - дегенди Маданият фондну председатели Макоева Люаза.

 

М.Адилова. Суратлада: художниклени ишлери; кёрмючде. Суратланы автор алгъанды.
Поделиться: