Казнагъа миллионну жартысы къайтарылгъанды

Полициячыла бла сюд приставла бирге бардыргъан ведомствола аралы рейдни кезиуюнде казнагъа 500 минг сом тёленнгенди. Налогланы эмда  жолда жюрюуню жорукъларына  бузукълукъла ючюн тазирлени тёлемегенлени «Къоркъуусуз республика» автоматизацияланнган комплексни болушлугъу бла тохташдыргъандыла. Рейд  бузукъчула  жууапха тартылмай къалмазлыкъларын ангылатыр мурат бла къуралгъанды.

Полициячыла бла сюд приставла Нальчикде машинала бютюнда кёп жюрюген  – Ногмов эм Чернышевского атлы орамла бирге къошулгъан жерде - излегендиле тазирлени бермей къутулургъа умут этгенлени. Бир ненча сагъатны ичинде инспекторла 70 транспортну тинтгендиле. Аладан бешисине арест салыннганды, бир машина сыйырылгъанды.  Битеу да бирге казнагъа административ тазирлени бла налогланы тёлетип, 518 минг сом жыйылгъандлы.

Къырал автоинспекторла бла сюд приставла тёлеуле заманында этилмесе, къаллай жууаплылыкъгъа тартылыргъа боллукъларын эсгертгендиле водительлеге. Тазир 60 кюнню ичинде берилирге керекди. Борч 10 минг сомдан кёп болса, водительни машинаны жюрютюрге эркинлигине чекле салыныргъа боллукъдула.

Законла тохташдырылгъан болжалда ахча тёленмесе, РФ-ни Административ бузукълукъланы кодексини 20.25-чи статьясыны 1-чи кесегине тийишлиликде мадарла толтуруладыла. Башхача айтханда, тазирни ёлчеми эки кереге кёбейтиледи, неда инсан  15 кюннге тутулургъа боллукъду.

Къалай-алай болса да, борч тёлетилликди. Ол санда сюд приставла ырысхыгъа арест салыргъа эркиндиле. Дагъыда борчу болгъан тыш къыралгъа барыргъа эркин тюйюлдю.   Къыралавтоинспекторла бир-бир тазирлени 20 кюнню ичинде тёленсе, ахчаны жаланда жартысын берирге онг болгъанын эсгертедиле.

Сиз  тазиригиз болгъанын бла къалгъанын УГИБДД-ны сайтында (www.gibdd.ru) билирге, аны тёлерге да боллукъсуз. Бу шартланы къырал жумушланы порталында (www.gosuslugi.ru) тамамларгъа онг барды.

 

Тикаланы Фатима хазырлагъанды.
Поделиться: